Tiks izdūta latgaliski i angliski raksteita gruomateņa “Trusīni vessim reitā pi puiša”

Tiks izdūta latgaliski i angliski raksteita gruomateņa “Trusīni vessim reitā pi puiša”

Bīdreiba “LgSC” izdūšonai gatavej latgaliski-anglisku izdavumu “Trusīni vessim reitā pi puiša”. Izdavumā sasateik šveicīšu muokslinīka i muziķa Vincenta Flikigera zeimiejumi, Edeitis Husaris teksti, kas jai ir sova veida debeja latgalīšu literaturā, i Džeimsa Vila angliskī tekstu tulkuojumi. Izdavums byus daīmams drukavuotā formatā, kū papyldynoj treis postkartis ar Vincenta zeimiejumim, i bezmoksys ari digitalā lejupīluodē latgalīšu kulturys ziņu portalā lakuga.lv i bīdreibys “LgSC” sātyslopā lgsc.lv. Taipat izdavuma zeimiejumi byus apsaverami izstuodē Rēzeknis nūvoda Lūznovys muižā.

Izdavuma “Trusīni vessim reitā pi puiša” idejis autors ir šveicīšu muokslinīks i muzikis Vincents Flikigers (Vincent Flückiger), kurs jau vaira nikai desmit godu ilgi regulari gastej Latvejā, Latgolā, jādz latvīšu volūdu i ceņteigi vuicās latgalīšu volūdu. Muokslinīks dorbojās pasauļa teikla grupā “Urban Sketchers”, kurymā apsavīnuojuši zeimātuoji, kas paruoda vidi sev apleik viņ mirkļa īspaidā i tūs spylgtajā dažaideibā. 2015. godā Leivuonā, Rēzeknē i Daugovpiļs nūvodā, kai ari Čehejā beja apsaverama muokslinīka zeimiejumu izstuode “Latgale laiku ritā” (nomināta ari Latgalīšu kulturys goda bolvai “Boņuks”), kurymā paruodeita lauku dzeive Latgolā – šaļtenis nu sadzeivis ar tradicionaluo kulturys montuojuma īmyužynuošonu, kuruos pīdzeivuotys diveju nedeļu garumā. Ituo izdavuma ideja – apvīnuot eisus i kūduleigus stuosteņus, kuru radeišonys izaicynuojumam ļuovusēs Edeite Husare, ar Vincenta zeimiejumim, rodūt myusdīneigu izdavumu par Latgolys šudiņdīnu. Edeite atzeist, ka tekstu radeišona gotovim zeimiejumim jai bejuse izaicynuojums, jo, koč ari kasdīna saisteita ar raksteišonu i latgalīšu volūdu, literatu dorbu topšonai vajadzeiga cyta sajiuta i raksteišonys veids. Izdavumā “Trusīni vessim reitā pi puiša” sasateik stuosti gon nu Edeitis, gon Vincenta Latgolys pīredzis – tūs navar saukt par autobiografiskim, koč ari tymūs ir pamatā dzeivē pīredzētys nūtikšonys, kas gon itūreiz dabuojušys jaunus “nūsacejumus” i stuostus. Stuosteņu golvonuo dūma ir īmyužynuot tūs kulturviesturis voi vīnkuorši dzeivis faktus, kas myusdīnu Latgolā ir kasdīna, nu daudzūs gadīņūs dreiži nu tuos var ari pagaist, pīmāram, dzīduošona pi krystu voi pīna goldi ceļa moluos. Kotram izdavuma eksemplaram davīnuotys ari treis postkartis ar zeimiejumim nu gruomatenis – tuos kotrys skaiteituojs var aizsyuteit kaidam kai sveicīnu nu Latgolys, dalikt rameitī pi sīnys voi izmontuot kai cytaiž.

Izdavuma redaktore ir myusdīnu spylgtuokuo latgalīšu literate Ilze Sperga, bet muokslineica Daina Salmiņa, kura struoduojuse gon pi Annys Rancānis jaunuokuo dzejis kruojuma “Prīca i klusiešona”, gon pi leluokuo latgalīšu dzīšmu kruojuma “Muna dzīšmu gruomota”. Kab dzeivi Latgolā vaira saprostu ari cytur, Vincenta ideja beja ari tū raudzeit puortulkuot angliski, deļ tuo stuostim kai tulkuotuojs pīsaisteits Džeids Vils, kurs itūgod bejs idejis autors i tulkuotuojs ari angliski-latgaliski izguojušajam latgalīšu autoru – Raibuo, Ligijis Purinašys i Ingridys Tāraudys – dzejis kūpkruojumam “Pādejais modeļs” (The Last Model), kurū 2020. goda rudinī izdeve Londonys izdevnīceiba „Francis Boutle Publishers”.

Koleidz 2021. goda suokuma daļā izdavums byus daīmams drukavuotā formatā, tū kotrys grybātuojs bezmoksys, aizpyldūt testu par Latgolys kulturviesturi (ar gruomatenis stuostūs saisteitim faktim), varēs dabuot i sev latgalīšu kulturys ziņu portalā lakuga.lv i bīdreibys “LgSC” sātyslopā lgsc.lv.

Koč ari izdavuma izdūšona beja paradzāta jau 2020. goda novembrī i leidza ar tū ari izdavuma zeimiejumu izstuode Rēzeknis nūvoda Lūznovys muižā, itys čudnais laiks īvīse sovys izmainis. Izstuode Lūznovys muižā ir puorcalta iz 2021. goda martu, kod paradzāta ari izdavuma svineiga atkluošona/autoru sasatikšona – kluotīnis voi attuolynuotajā formatā – tū ruodeis laiks i vaļstī pastuovūšī īrūbežuojumi.

Izdavuma “Trusīni vessim reitā pi puiša” topšona īspieja ar Latgolys kulturys programys paleigu, kū eistynoj Latgolys regiona atteisteibys agentura ar Vaļsts kulturkapitala fonda un A/S “Latvijas valsts meži” atbolstu.

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.