Nūskaidruots konkursa “Latgolys prozys skaitejumi 2020” uzvarātuojs
Literarūs prozys tekstu konkursā „Latgolys prozys skaitejumi 2020” nūskaidruota uzvarātuoja — tekstilmuokslineica i rakstneica Annele Slišāne. Jei skaiteja eisstuostus “Tuoraga kule”, “Ai tuoraga tortu gostūs” i “Vilcīnā” i pīsadaleis storptautyskajā literaturys festivalā “Prozas lasījumi 2020”, pyrmū reizi festivala autoru vydā byus ari lobuokais Latgolys prozys autors.
Latgolys regiona autoru prozys tekstu konkurss itūgod tyka izsludynuots pyrmū reizi, dorbu viertiešona nūtyka div kuortuos. Pyrmajā kuortā žureja aizkluotai viertēja vysus īsyuteitūs tekstus, izalosūt lobuokūs daleibai ūtrajā kuortā. Pandemejis īrūbežuojumu deļ ūtruo kuorta nanūtyka kluotīnē, kai suokumā beja īcarāts, bet autori sovus tekstus skaiteja kamerys prīškā Rēzeknē. Žureja nūsavēre tekstu skaitejumus video i izavielēja uzvarātuoju.
Autori tyka aicynuoti konkursā īsyuteit da tuo napublicietūs tekstus latgalīšu rokstu volūdā voi latvīšu literarajā volūdā. Dorbi tyka vārtāti, vysu vaira izceļūt na teksta volūdu, bet literaruo teksta kvalitati i pīdareibu Latgolys kulturtelpai. Konkursa „Latgolys prozys skaitejumi 2020” dorbus viertēja literaturzynuotneica i Austrumlatvejis literaruos akademejis vadeituoja Maija Burima, rakstneica Laima Kota, dzejneica Anna Rancāne i literaturzynuotneica i dzejneica Iveta Ratinīka.
Rakstneica Laima Kota, rezumejūt sovu pīredzi, soka: “Itymus laikūs byut rakstnīkam — tur dūmuot vajag, lai kū tik napraktisku dareitu ar prīcu! Vysim autorim — sirsneigs paļdis! Laseišona ci stuostu skaiteišona beja cīši interesnuo līta, nu tīsys prīceigi, ka ir jauni autori, kuri cer ar vuordu puormaineit pasauli.”
Tekstilmuokslineicai i rakstneicai Annelei Slišānei cyta goda suokumā izīs prozys gruomota “Tuoraga stuosti”. Konkursā “Latgolys prozys skaitejumi 2020” žurejis atzineibu giva autoris īsnīgtais eisstuostu ciklys nu ituos gruomotys manuskripta.
Slišānis īprīkšejuo gruomota i tekstilmuokslys projekts “100 deči Latvijai” beja duovona Latvejis dzimšonys dīnā i pīsaisteja plašu sabīdreibys viereibu. Symtgadeigūs stuovūs Latgolā i Reigā nūaustī deči kūpā ar aužūt pīraksteitajim stuostim tyka izstuodeiti naskaitamuos vītuos Latvejā i pīsaisteja viereibu ar dzili personeigā pīredzē sakņuotim stuostim, kas apkūpuoti gruomotā. Tymā pošā godā autore īgiva Latgalīšu kulturys goda bolvu “Boņuks” par tekstilmuokslys i literaturys projektu “#100dečiLatvijai”.
Jaunajā A. Slišānis gruomotā “Tuoraga stuosti” ir apkūpuoti stuosti it kai par bīzpīnu, it kai par sīvītem, it kai par sīvītem myusu dīnu sabīdreibā. Kai autore poša soka: “Tuorags kuo metamorfoze. Stuosti par izaugšonu. Par cylvaka izaugšonu, izaugšonu caur vusuom suopiem i puorbaudejumīm. Par izaugšonu par cylvaku. Par sīvīti.” Kas tod ir tuorags, bīzpīns? Kod pīns ir saskuobs, jis vaira nav dzerams. Viņ saryudzs par ryuguli i atsiļdeits iz plitys, itys pats pīns otkon ir lītojams uzturā.
Konkursa nūrisi atbaļsteja SIA “Zeize”. Uzvarātuoja sajims uzjāmuma sagatavietū duovonu karti pakolpuojumu voi preču sajimšonai salonā “DekoPrint” Rēzeknē, Atbreivuošonys alejā 112. Konkursa video izveiduoti ar Vaļsts Kulturkapitala fonda finansialu atbolstu projektā “Digitālā Latgale portālā lakuga.lv”.
Konkursa organizators bīdreiba “LgSC” apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysu pyrma atbaļsteit jaunūs latgalīšu autorus i izdūt kvalitativu literaturu, viereibu dagrīžūt jaunīšu auditorejai.
Itūgod storptautyskais literarais festivals “Prozas lasījumi 2020” nūteik tīšsaistē, jū organizej Latvejis Rakstnīku savīneiba. Laika gaitā „Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki.