Sibira etnolingvistiskūs ekspediceju materialu publiskuošona

2021. godā nūtyka dorbs pi Sibira ekspediceju digitalizacejis i publiskuošonys.
Etnolingvistiskūs ekspediceju materiali daīmami Latvīšu folklorys kruotivis digitaluo arhiva garamantas.lv kruojumā SEEM. Tymā kūpumā ir 10 kolekceju pa ekspediceju nūtikšonu laikim (2004–2009)  i vīna vyspuoreiga – “Etnografiskūs prīškmatu kolekceja” paruoda ekspediceju laikā latgalīšu i malenīšu sātuos atrostus i viereibys cīneigus etnografiskūs i sadzeivis prīškmatus (kūpumā apsaverams ap 100 karteņu). Kotrai kolekcejai ir seikuoks juos aproksts – nūtikšonys laiks, pīsadalejušī ļauds, apmaklātūs vītu i spylgtuokūs teicieju puorskaitejums. Davīnuots ap 450 karteņu, ap 90 īrokstu anotaceju, sagataveits 130 personu profilu. Anotacejis papyldynuotys ar nalelim audio fragmentim, kuramūs atsakluoj latgalīšu volūdys dažaiduos izlūksnis. 

Ekranskots nu digitaluo arhiva garamantas.lv

Sovpus projekta ūtrei daļa, e-gruomota “Sibira stuosti”, atspīgilej ekspediceju laika vāruojumus i pietejumus par dazynuotū. Gruomotai ir treis dalis, kuruos taipat sovā storpā ir cīši saisteitys. Izlūkšņu tekstu hrestomatejā atrūnami teicieju stuostu atšifriejumi parostā fonetiski morfologiskā pīrokstā. Diasporys viesturis sadaļa īpazeistynoj ar apceļuotū teritoreju, taipat ar aprokstim par atrostajim ļaudim i jūs volūdu. Eseju daļā apkūpuoti stuosti par Sibirī atrostū i saprostū, atkluojūt i ekspediceju emocionalū pusi.

Projekta eistynuošona i materialu publiskuošona bejuse īspiejama ar Vaļsts kulturkapitala fonda mierkprogramys “KultūrELPA” atbolstu. Projekta vadeituoja – LU Humanitarūs zynuotņu fakultatis Baltu volūdnīceibys katedrys profesore Lideja Leikuma. Projekta realizacejā pīsadalejuši: Iļze Sperga, Maryta Lasmane, Eta Nikolajeva, Kristīne Pokratniece, Kristīne Zute, Muora Mortuzāne-Muravska, Artis Logins, Solveta Logina, Ilona Ratinska, Aleksejs Andronovs, Dainis Juraga.