Cyti

Digitaluos latgalīšu uzleimis aplikacejom “WhatsApp” i “Telegram”

Digitaluos uzleimis sazinis aplikacejom “WhatsApp” i “Telegram” radeitys latgalīšu volūdys prestiža ceļšonai i lītuojuma pīauguma veicynuošonai. Uzleimu aplikacejis ītver kasdīnā i ari eipašuokuos dzeivis šaļteņuos lītuotys frazis i vuordus latgalīšu volūdā, tuos papyldynuotys ar četrim Latvejā lītuotim karūgim – Latvejis, Latgolys, līvu i Sielejis karūgu. Kūpumā bezmoksys pīejamys 42 uzleimis.

Uzleimu izveidi atbaļstejs ASV dzeivojūšais latgalīts, uzjiemiejs i Latvejis gūda konsuls Teksasys štatā Pīters Aloizs Ragaušs. Uzleimu dizainu veiduojuse Inese Krivmane, tehniskū atbolstu snēdzs programātuojs Juoņs Rancāns.

Lītuotnei “WhatsApp” dūmuotuo aplikaceja “Latgalian stickers”/ “Latgalīšu uzleimis” bezmoksys daīmama Android operātuojsistemys mobilūs īreiču lītuotuojim. iPhone lītuotuojim cikom aplikaceja nav daīmama, jo nu uzjāmuma “Apple” natyka sajimts akcepts tuos īvīsšonai. Idejis autori itūšaļt struodoj pi cytu rysynuojumu, lai uzleimis byutu daīmamys ari iPhone eipašnīkim. Cikom iPhone lītuotuoji “WhatsApp” sajimtuos latgalīšu uzleimis nu Android sistemu lītuotuoju var saglobuot kai “Favorīti/Favourite” (juoizspīž iz uzleimis i juosekoj tuoļuok nūruodeitojim darbeibom) i izmontuot syuteišonai.

Sovukuort lītuotnis “Telegram” izmontuotuoji bez īrūbežuojumu uzleimis var lītuot gon sovūs Android, gon iOS tuolruņūs.

Uzleimis “WhatsApp” lītuotuojim Android telefonūs

https://play.google.com/store/apps/details?id=com.ltg.stickers

Uzleimis “Telegram” lītuotuojim Android i iOS telefonūs

https://t.me/addstickers/LatgalianStickers

Akceja “Latgalīšu volūdai draudzeiga vīta”

“Latgalīšu kulturys ziņu portals lakuga.lv” radejs eipaša dizaina uzleimi “Latgalīšu volūdai draudzeiga vīta”, pīduovojūt jū bez moksys sajimt uzjāmumim, organizacejom, vaļsts i pošvaļddeibu īstuodem, kuruos teik lītuota latgalīšu volūda i kuru klientim, pakolpuojumu sajiemiejim ir vareiba sasazynuot latgaliski, kai ari vītom, kuramuos pīīmami resursi latgaliski. Uzleimis dizainu veiduojuse Inese Krivmane.

Portals lakuga.lv aicynoj uzleimi sajimt īstuodis, organizacejis, uzjāmumus, kuri grib paust pozitivu attīksmi pret latgalīšu volūdu, i pīlikt tū radzamā vītā, pīmāram, iz īejis durovu. Uzleimis sajimšona nauzlīk nikaidus pīnuokumus i saisteibys. Tū sajāmušuos vītys ir atzeimuotys eipašā kartē. Uzleime lejupīluodiešonai ITE.

Latgalīšu volūdys pošvuiceibys materials (2016)

Pošvuiceibys materials “Vuicīs raksteit latgaliski!” byus nūdereigs gon jaunīšim kasdīnys saziņā, gon ari Latgolys kulturys i sabīdryskajim darbinīkim kasdīnys dorbā, kai ari vysim, kurim ir svareigi prast pareizi raksteit latgaliski. Apvuiceibu materials paradzāts īsuociejim, bet byus nūdereigs zynuošonu atsvaidzynuošonai ari tim, kas jau roksta latgaliski.

Kūpumā materialā īkļautys ostonis nūdarbeibys, kotru nu tom veļtejūt sovom temom. Teoreju papyldynoj praktiski aizdavumi i tim pīvīnuotuos atbiļdis, kas ļaus puorbaudeit, voi teoreja ir īsavuiceita pareizi. Materials sagataveits, bolstūtīs iz Latvejis Republikys Tīslītu ministrejis 2007. godā apstyprynuotajim Latgalīšu pareizraksteibys nūsacejumim. Pošvuiceibys materialu sagatavejuse ilggadeja latgalīšu tekstu korektore Muora Mortuzāne-Muravska.

Materials daeinams ITE.