Bīdreibai 15. dzimšonys dīna i jauns nūsaukums

Bīdreibai 15. dzimšonys dīna i jauns nūsaukums

Bīdreiba “LgSC” ir vīna nu zynomuokūs i aktivuokūs latgalīšu organizaceju, kura eistynoj projektus latgalīšu volūdys i latgaliskuos kulturys telpys saglobuošonai i atpazeistameibys veicynuošonai. Itūrudiņ bīdreiba nūsvinēja 15 godu pastuoviešonys jubileju i maineja nūsaukumu nu “Latgolys Studentu centrs” iz “LgSC”.

Oficiali sovu darbeibu bīdreiba “LgSC” suoce 2005. gods 2. novembrī, apvīnojūt jaunīšus, kurim ir svareigi saglobuot i atteisteit Latgolys i latgaliskū kulturtelpu, latgalīšu volūdu. 15 darbeibys godu laikā sovu mierķu sasnīgšonai bīdreiba ir izdavuse latgalīšu autoru dorbus, reikuojuse seminarus, vosorys školys i latgalīšu rokstu volūdys nūdarbeibys, leidzdorbuojusēs latgalīšu raksteibys nūsacejumu izstruodē, organiziejuse izklaidis i latgalīšu modernū kulturu popularizejūšus pasuokumus. Bīdreiba ari uztur pasaulī vīneigū tikai latgalīšu rokstu volūdā saturu rodūšū medeju “Latgalīšu kulturys ziņu portalu lakuga.lv”, kai ari eistynoj cytys aktivitatis.

Itymā rudinī bīdreiba īgiva jaunu nūsaukumu i sātys lopys izskotu, kurs izveiduots ar projekta “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING (projekta leigums Nr. 778384)” atspaidu.

Par jaunū nūsaukumu vaļdis prīkšsādātuoja Edeite Husare soka: “Laika ritiejumā mainejīs nav viņ godu skaitlis kalendarā, bet ari poša bīdreiba, aktivitatis i bīdrus interesis. Ja sovulaik bīdreiba apvīnuoja nu Latgolys eimūšūs studentus, pīduovojūt aktivitatis i pasuokumus, tod niu bīdreibys dorbs i interesis ir vaira vārstys iz latgaliskuos kulturys kūpejū vierzeibu, eistynojūt izdeviejdarbeibys, portala lakuga.lv uzturiešonys i latgalīšu rokstu volūdys veicynuošonys projektus. Par tū leidzšinejais nūsaukums “Latgolys Studentu centrs” vaira nasaruodeja atbylstūšs asūšajai situacejai, i pījēmem lāmumu iz prīšku kai organizacejis oficialū nūsaukumu izmontuot da šam lītuotū i atpazeistameibu īgivušūs bīdreibys abreviaturu “LgSC”.”

Pastuosti cytim!

Leave a Reply

Your email address will not be published. Required fields are marked *