Pyrmatskaņojumu pīdzeivuos kriminalromana “Bruoli” radejis īstudiejums
Nu 21. da 25. marta Latvejis Radejis 1 eterā izskanēs pyrmuo kriminalromana latgaliski “Bruoli” radejis īstudiejums. Jaunajā īstudiejumā, kura muokslinīcyskais vadeituojs ir Kristaps Rasims, pīsadaleis 25 Latvejis profesionalūs i amaterteatru akteri, kai ari sabīdreibā pazeistamys personeibys.
Latgalīšu literata Alda Bukša kriminalromans “Bruoli” tyka izdūts 2020. godā, izīmūt kai latvīšu literarajā, tai latgalīšu rokstu volūdā. Dorbs sajiems na tik atzineibys pylnys skaiteituoju atsauksmis, nu ari nūvārtāts ar Latgalīšu kulturys goda bolvu “Boņuks”. Kriminalromana motivs viestej par naveiksmeigu pokera spēli ekskluzivā Londonys klubā, kas latvīti Edgaru īvalk nūtikšonu viertinē, nūvadūt jū Helsinku cītumā. Pa itū laiku Igaunejā bez viests pagaist Edgara jaunuokais bruoļs. Aizasuoc Edgara pāddziņa gaitys: nu Igaunejis iz Zīmeļlatgolu, Latvejis-Krīvejis pīrūbeža jūslu i Londonu, tai pamozom izgaismojūt sarežgeitu storptautysku nūzīdzeibys teiklu.
Režisors Viesturs Kairišs kriminalromanu sovulaik raksturuojs kai aizraunūšu i dinamisku, kas paruoda šudiņ aktualū nūzīdzeibys spektru, analizej tuos socialūs īmesļus. “Šaļtim meiluo Zīmeļlatgola atguodynoj bruoļu Koenu “Fargo” ainovu – ar nagaideitom ašņa paļtim iz tikū izkrytušuo snīga. I eipaša mīlesteiba pret Latgolu i latgalīšu volūdu. Koč ari detektivs ir storptautyskys, īkļaunūt Krīvejis i Eiropys kriminaluo pasauļa vaibstus, svareiguokais viestejums ir dūmuots mums pošim:
- Kas tev traucej braukt paceli nu ituo cauruma?
- Kai? Ite ir muna sāta…,” tai par romana golvonū dūmu izasacejs V. Kairišs.
Kriminalromana “Bruoli” radejis īstudiejums latgaliski nu 21. da 25. marta Latvejis Radejis 1 eterā 22.05 stuņdēs izskanēs pīcuos daļuos. Romana sižetu dramatiziejuse Rūta Dišlere. “Bruoļu” radejis versejā pīsadola 25 Latvejis profesionalūs i amaterteatru akteri, sabīdreibā pazeistamys personeibys, kai ari pats kriminalromana autors Aldis Bukšs. Īstudiejumā skanēs akteru Jāņa Kruoņa, Katrīnys Grigys, Ingys Misānis-Grasbergys, Kristapa Rasima bolsi, kurim pīsavīnuojuši Baļtinovys dramatiskuo kolektiva “Palādas” i Rēzeknis Tautys teatra akteri – Anita Ločmele, Jāzeps Jermacāns, Imants Slišāns, Aldis Leidums, Ilmārs Dreļs, Jānis Pampe i cyti. Taipat īstudiejumā īsaskanēs ari sabīdreibā pazeistamu personeibu – aktera i komika Jāņa Skuteļa, radejis personeibys i influencera Laura Zalāna, muzika Renāra Kaupera, pasuokumu i raidejumu vadeituoja Mārtiņa Kozlovska aba Kozmena, prīstera Guntara Skutela i cytu bolsi.
Īstudiejuma muokslinīcyskais vadeituojs, režisors i komponists Kristaps Rasims par dorbu pi kriminalromana “Bruoli” puortapšonys radejis īstudiejuma formatā soka: “Romanu “Bruoli” es uzskotu par vīnu nu lobuokūs sova žanra literaturys dorbu na viņ Latgolys i Latvejis, nu ari plotuokā mārūgā. Ka maņ kaids saceitu, ka tū ir sarakstejs na myusu pošu Aldis Bukšs, bet, par pīmāru, legendarais Stigs Larsons, es piļneibā nūtycātu! Deļtuo ar lelu prīcu dareju itū dorbu, kas beja cīši lels i smolks – mes kūpā bejom 25 īrunuotuoji-akteri, i īroksti nūtyka četruos studejuos dažaiduos Latvejis vītuos. Koč ari dorbs prasejs daudzi laika i radeits daudzi gigabaitu skanis failu, vys tik itymā procesā sagivu kaifu – struoduot kūpā ar breineigim cylvākim pi tik loba materiala! Turu nūceju, ka radejis klauseituojim byus leidzeigys sajiutys.”
Kriminalromana “Bruoli” radejis īstudiejumu ar Latvejis Radejis i Vaļsts kulturkapitala fonda finansialu atbolstu eistynoj Latvejis Radejis Latgolys studeja i latgalīšu kulturys kusteiba “Volūda”. 2021. godā obeju sadarbeibā topa ari pyrmī radejis skaitejumi latgaliski – Ilzis Spergys stuostu kruojuma “Dzeiveiba” īroksts.