Lauku breiveiba, drūsme i draudzeiba – Sunāna pīdzeivuojumi jaunā komiksu gruomotā bārnim latgaliski
Marta suokumā latgalīšu kulturys kusteiba “Volūda” izdavuse Laurys Melnis i muokslineicys Viviannys Mariis Stanislavskys kūpeigū dorbu – pyrmū komiksu gruomotu bārnim latgaliski “Sunāns breiveibā”. Gruomota ir stuosts par suni i juo dzeivi, puorsaceļūt nu piļsātys iz laukim.
Komiksa “Sunāns breiveibā” golvonais varūņs ir suņs taišni taidā vuordā – Sunāns. Saiminīku dzeivisvītys mainis deļ Sunāns niu spīsts puormeit sev īrostū piļsātys vidi iz Latgolys laukim. Tī jam juosavuica sadzeivuot kai ar dabuotū breiveibū, tai saimisteibys sorgu da ituo – kači. Gruomota dūs vareibu bārnim īpasazeit kai ar myusu dīnu piļsātys, tai lauku dzeivi, mudynuos byut drūsmeigim i sovā vydā draudzeigim.
Jaunuo komiksa teksta autore Laura Melne ir latgalīšu kulturys ziņu portala redaktore, kai uorštata autore roksta i rakstejuse ari žurnalim “A12”, “I’m perfect”, portalim retv.lv, kroders.lv i cytim. Taipat Laura ir korektore i literaruo redaktore cytu autoru dorbim, tok komikss “Sunāns breiveibā” ir juos debejis dorbs pošai kai gruomotu autorei.
Ideja par komiksa tipa gruomotu, kas ir pyrmuo taida gruomota bārnim latgaliski, Laurai rodusēs sarunuos ar pīredzejušū gruomotu muokslineicu Viviannu Mariu Stanislavsku. “Gruomotu veikalūs nareši pasaveru ari iz bārnu gruomotu plauktu i prīcojūs, ka pīduovuojums ir daudz interesantuoks nakai tys beja munā bierneibā. Tok ruodejuos, ka tryukst leidzeiga satura bārnim taišni latgaliski. Uzrunuoju Viviannu, kab kūpā radeitu myusdīneigu gruomotu bārnim latgaliski, i jau dreiži saprotom, ka tys byus komikss. Pasaulī tys ir populars žanrys, nu Latvejā nazkai nav tik izplateits. Viviannai tys pasadūd i ruodejuos, ka komikss varātu byut lobs veids, kai raudzeit paleidzēt īpazeit latgalīšu volūdu ari cylvākim, kuri cytaiž gruomotu latgaliski varbyut i naizavālātu,” par gruomotys formata ideju stuosta Laura Melne.
Vivianna Maria Stanislavska ir Latvejā zynoma gruomotu muokslineica, kura bārnu gruomotu radeišonā sasadorboj ar vairuokom izdevnīceibom. Par dorbu pi “Sunāns breiveibā” muokslineica soka: “Vysod asu gribiejuse izzeimuot komiksu i itys dorbs kūpā ar Lauru izavērte kai seneja sapyna pīpiļdeišona ar papyldu vierteibu! Da ituo zeimuoju komiksus viņ puora lopu apjūmā, i itys ir pyrmais, kas golā tics par vasalu gruomotu. Niu ir saguojs taišni taids komikss, kaidu gribiejom redzēt, deļtuo asu pateiceiga Laurai i vysai komandai par uzticeibu i iztureibu!”
“Sunāns breiveibā” redaktore ir literate Jana Egle, bet izdeviejs – latgalīšu kulturys kusteiba “Volūda” (bīdreiba “LgSC”). Gruomota byus daīmama kai bibliotekuos, tai i gruomatneicuos nu marta vyds, bet jau niu tū var pasyuteit latgalīšu kulturys kusteibys “Volūda” zīduojumu platformā-veikalā ITE.
Gruomotys izdūšonu atbaļstejuse Vaļsts kulturkapitala fonda Latgolys kulturys programa, kurū eistynoj Latgolys regiona atteisteibys agentura, bet finansiali atbolsta A/S “Latvijas valsts meži”.