“LgSC” īsasaistejuši NVO organizaceju kapacitatis i ītekmis miereišonys pietejumā

“LgSC” īsasaistejuši NVO organizaceju kapacitatis i ītekmis miereišonys pietejumā

Latvejis Piļsūniskuo alianse (LPA) itugod aizsuokuse eistynuot pietejumu “Navaļstiskūs organizaceju kapacitate, metodologeja ītekmis i multiplikativuo efekta miereišonai”, kurā īsasaistejuse ari bīdreiba “LgSC”.

LPA eistynuotū pietejumu atbolsta Aktivūs īdzeivuotuoju fonds i vīns nu pietejuma mierku ir izstruoduot metodologeju navaļstiskūs organizaceju ītekmis nūsaceišonai, kū varātu izmontuot informacejis dabuošonai par konkretu organizaceju darbeibu i davumu dažaidu sabīdreibai svareigu procesu vierzeibai Latvejā.

Bīdreiba “LgSC” atsasaukuse Latvejis Piļsūniskuos aliansis aicynuojumam organizacejom pasadaleit ar sovu pīredzi, jo taišni tikū struoduojuse pi organizacejis strategejis, kurā bīdreibys ītekmis, dorbu i sasnāgumu vierteišonai ari beja dagrīzta viereiba.

Kab pīsadaleitu pietejumā, bīdreibys vadeituoja Edeite Husare itūnedeļ sasatyka ar pietnīku Uldi Spuriņu i atbiļdieja iz vaicuojumim par bīdreibys miseju i mierkim, kasdīnys darbeibu i reiceibom mierku sasnēgšonai, kai ari izviertiejuma metodem i praksi, kab saprastu, cik sekmeigi ir organizacejis dorbuošonuos rezultati. Taipat beja vareiba aizadūmuot i atbiļdēt iz vaicuojumim, voi bīdreibai nūdarātu kaids atbolsts nu uorīnis, kab saprastu sovys darbeibys efektivitati, i byutu gataveiba ļautīs analizei.

Struodojūt pi bīdreibys “LgSC” strategejis atjaunuošonys, konkreti mierki, kritereji i izviertejums, beja vīni nu atslāga punktim “LgSC” darbeibys vierzeibā. “Dūmojūt par myusu organizacejis darbeibys strategeju, daguoja paturēt pruotā, kai ar īcarātajim dorbim saglobuot leidzsvoru storp bīdreibys dorbu navaļstiskūs organizaceju vydā i dorbuošonuos latgalīšu kulturys vaicuojumu vierzeibā Latvejā, tai ari par bīdreibys īškejū vidi, kurā labi, pīdareigi i motivāti juosajiut ari pošu bīdrim. Deļtuo turim nūceju, ka pasadaleišona ar myusu pīredzi, paleidzēs Latvejis Piļsūniskajai aliansei sataiseit lobuoku pietejumu i metodologeju, kas i mums pošim iz prīšku varātu cīši nūderēt.” atzeist Edeite.

__________________

Bīdreibys strategejis atjaunuošona ir vīna nu projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu. Projekts teik eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.

Pastuosti cytim!

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.