Bīdreiba “LgSC” īpazeist Norvegejis mozuos volūdys i latvīšu kulturu Oslo

Bīdreiba “LgSC” īpazeist Norvegejis mozuos volūdys i latvīšu kulturu Oslo

Vakar, 17. augustā, bīdreibys “LgSC” puorstuovis Edeite Husare i Vineta Vilcāne pīsadaleja sasatikšonā ar Norvegejis organizacejom i aktivistim, kab īpasazeitu i saprastu darbeibys sferys īspiejamom tuoļuokom sadarbeibom.

Sasatikšona ar Norvegejis organizaceju puorstuovim nūtyka kai vīna nu Aktivus īdzeivuotuoju fonda projekta “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu, kab veicynuotu bīdreibys “LgSC” vareibu izzynuot kulturys i mozuok lītuotūs volūdu situaceju Norvegejā i pīsaisteit potencialus sadarbeibys partnerus aktivitatem bīdreibys dorbā iz prīšku.

“LgSC” sasatikšonā puorstuovēja bīdreibys vadeituoja Edeite Husare i bīdreibys storptautyskūs projektu koordinatore Vineta Vilcāne, kai ari kluotyn beja izaugsmis platformys “MeYou.One” treneri Ieva Johansson i Henric Johansson, kuri projekta laikā ir atbaļstejuši bīdreibu “LgSC” kai komandys styprynuošonys, tai strategejis veiduošonys aktivitatēs.

Itamā reizē “LgSC” beja vareiba īpasazeit ar “Kvensk Finsk Riksforbund” generalsekretaru Rune Bjerkli i Ievu Melbārdi, kurei dorbojās Oslo latvīšu kūpīnā, bejuse Oslo latvīšu bīdreibys vadeituoja, bet niu ir Oslo latvīšu teatra “O’LatTe” vadeituoja, izzynuot obeju organizaceju darbeibys vierzīņus i atrast kūpeiguos interesis i potencialūs saskaris punktus sadarbeibai iz prīšku.

Koč ari bīdreibai “LgSC” jau ir vysā lela pīredze i zynuošonys par dažaidom pasauļa mozuok lītuotajom volūdom (par pīmāru, Igaunejā, Pūlejā, Meksikā, Niderlandē i cytur), vys tik itei sasatikšona beja vareiba pyrmū reizi izzynuot ari par kveni volūdu i tū, kai tei teik saglobuota, kaids ir tuos statuss i vareiba atsateisteit iz prīšku. Kveni ir Norvegejis suomi, kurī dzeivoj Norvegejis zīmeļu daļā, runoj sovā volūdā, kas ir suomu volūdys dialekts. Kveni volūdā runoj aptyvai 2000 da 8000 cylvāku i tī taipat kai latgalīšu volūdys lītuotuju vydā ir vacuoka goduguojuma ļaužu. Kveni volūdu cieški pīskaita pi suomu volūdys, i sovulaik kveni volūdys runuotuoji pīdzeivuojuši styprus Norvegejis ceņtīņus jūs asimilēt norveģu vydā, kas nūveds pi tik moza kveni volūdys runuotuoju skaita. Nasaverūt iz tū asociaceja reikoj dažaidys aktivitatis kveni volūdys runuotuojim, napaseņ sataiseits ari pyrmais eisstuostu konkurss, kurā sovus stuostus kveni volūdā aicynuoti raksteit kai bārni tai pīaugušī. Taišni itei ideja ruodejuos interesna kai aktivitate, kū leidzeigu varātu dareit ari latgaliski. Bīdreiba “LgSC” jau reikoj prozys dorbu konkursu autorim, kuri pīdareigi Latgolys kulturtelpai, nu tī vaira aicynuoti pīsadaleit literati. Taipat “Kvensk Finsk Riksforbund” vīna nu aktivitašu ir ari kveni-suomu festivals.

Sovutīs Ieva Melbārde pastuosteja par Norvegejis latvīšu aktivitatem Oslo i jo eipaši izsvēre, ka arī Oslo latvīšu teatrī “O’LatTe” ir akteri, kuri jādz runuot latgaliski, kas “LgSC” īinteresēja kai potencialu sadarbeibu, par pīmāru, kaidā nu radejis teatra īstudiejumu īrokstu koč kod iz prīšku, meklejūt jaunus latgaliski runojūšu akteru bolsus. Jauni radejis teatra lasejumi voi īstudiejumi, sasadorbojūt ar Latvejis Radejis Latgolys multimedeju studeju, ir vīns nu bīdreibys “LgSC” mierku i apsajimšonu ari dorbam tuoļuok.

_________________

Nu 2021. goda 1. maja da 2022. goda 31. oktobra bīdreiba “LgSC” eistynoj projektu “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”. Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja. Sajimtais atbolsts 19 994,87 €. Vaira par projektu var izzynuot ite: https://lgsc.lv/aktivus-idzeivuotuoju-fonds/.

Pastuosti cytim!

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.