“LgSC” darbeibu niu var atbaļsteit ari car platformu “Mobilly”

“LgSC” darbeibu niu var atbaļsteit ari car platformu “Mobilly”

Niu bīdreibys “LgSC” darbeibu var atbaļsteit ari ar moksuojumu platformys “Mobilly” īspiejom – augusta vydā nūslāgts leigums, kab “Mobilly” zīduojumu sadaļā byutu vareiba pazīduot ari latgaliskajom aktivitatem, kū dora bīdreiba “LgSC”.

Moksuojumu platforma “Mobilly” pīduovoj kotram grybātuojam atbaļsteit bīdreibys, apvīneibys, fondus i organizacejis, kas eistynoj lobdareibys projektus, izsverūt, ka tom juoatbiļst ari poša “Mobilly” vierteibom, kas ir ryupis par vidi i sabīdreibu, kaidā dzeivojam.

Minimaluo summa organizaceju atbolstam ir 3,00 eiro, maksimaluo vīnā reizē – 150,00 eiro. Organizacejis i iniciativys var atbaļsteit ar regularū moksuojumu reizi mienesī, voi ar vīnreizeju moksuojumu. Taipat platforma reizi godā, apsavīnojūt ar labdareibys organizaceju “Ziedot.lv” reikoj kampaņu #WhiteFriday, kurā mudynoj sabīdreibu vaira īsasaisteit navaļstiskūs i labdareibys organizaceju atbaļsteišonā.

Da ituo pazīduot bīdreibai “LgSC” varēja ar puorskaitejumu bīdreibys kontā, nu aicynuojumi atbaļsteit “LgSC” ar zīduojumim nabeja mierktīceigs vierzīņs. Tok itūšaļt, saprūtūt, ka sabīdreibys atbolsts zīduojumu veidā ļaun vaira stabilizēt bīdreibys dorbu i padareit tū naatkareiguoku nu projektu finansiejumu, bīdreiba cīši prīcuosis par jebkaida leluma i regularitatis atbolstu, kab īcarātī dorbi vēļ vaira ītu iz prīšku.

Bīdreiba platformys “Mobilly” organizaceju katalogā atrūnama ITE

Par bīdreibu “LgSC”, kuru var atrast ar nūruodi “Latgalīšu volūdai draudzeiga vīta”, platformā “Mobilly” pi atbolsta vareibys ir itaids stuosts:

Latgola, Latveja i pasauļs kai latgalīšu volūdai draudzeiga vīta ir bīdreibys “LgSC” (pyrma tuo zynoma kai “Latgolys Studentu centrs”) mierkis i dareišonys vierzīņs. Bīdreibys dorba pamatā ir vīneigais kasdīnā latgaliski viests publicejūšais medejs – “Latgalīšu kulturys ziņu portals lakuga.lv”, pasauļs diktats latgalīšu rokstu volūdā, latgalīšu rokstu volūdys apvuiceibys, dažaidi latgaliski izdavumi bārnim i pīaugušajim, sabīdreibys īsaistis akceja “Latgalīšu volūdai draudzeiga vīta”, konkurss literatim “Latgolys prozys skaitejumi”, folklorys kūpa “Ceidari”, izgleitojūši seminari jaunīšim i pīaugušajim, radejis lasejumim latgaliski i cytys kai jaunys, tai par tradiceju tykušys aktivitatis latgalīšu volūdys saglobuošonai, populariziešonai i atteisteišonai.

Sabīdryskuo lobuma organizaceja bīdreiba “LgSC” ir vīna nu senejuokūs i aktivuokūs latgalīšu kulturys organizaceju, kas apvīnoj cylvākus, kurim ir svareigi saglobuot i atteisteit Latgolys i latgaliskū kulturtelpu, latgalīšu volūdu. Atbolstūt myus, jiusu zīduojums ļaus latgalīšu volūdai kai svareigai latvīšu volūdys daļai kasdīnā skanēt skaļuot, plotuok i ilguok.

________

Zīduojumu dasaisteišonys aktiviziešona kai īnuokumu dažaiduošonys vareiba ir vīna nu projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu. Projekts teik eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.

Pastuosti cytim!

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.