Tūp stuostu kruojuma “Dzeiveiba” radejis lasejumu verseja

Tūp stuostu kruojuma “Dzeiveiba” radejis lasejumu verseja

Septembra ūtrajā pusē tyka aizsuokts dorbs pi Ilzis Spergys stuostu kruojuma “Dzeiveiba” radejis lasejumu īroksta. Radejis lasejumu muokslinīcyskais vadeituojs-režisors ir muzikis, akters i pasuokumu vadeituojs Kristaps Rasims, bet stuostu klausomuos versejis golvonais bolss – Latvejis Nacionaluo teatra aktrise Inga Misāne. Radejis lasejumi tūp, sasadorbojūt bīdreibai “LgSC” i Latvejis Radejis Latgolys studejai, ar Vaļsts kulturkapitala mierkprogramys “KultūrElpa” atbolstu.

Ilzis Spergys debeja stuostu kruojumā “Dzeiveiba”, kas izguojs 2014. godā, apkūpuoti deveni da tuo napublicāti voi škārsteiklā fragmentari publicāti stuosti latgaliski. Stuostu kruojums sajēme Latgalīšu kulturys goda bolvu “Boņuks” par lobuokū snāgumu literaturā 2014. godā, kai ari Ilze Sperga par “Dzeiveiba” tyka nomināta Latvejis literaturys goda bolvā “LaLiGaBa” kategorejā “Goda debeja”. Stuostu kruojuma redaktore Anna Rancāne par tū sovulaik sacejuse: “Ilzis Spergys stuostūs dzeivoj mozī ļauds. Tī, par kurim Svātajūs Rokstūs saceits, ka taišni jim Dīvs atkluojs dabasu vaļsteibys nūslāpumus. I bāda asūt viņ tim, kurī nūdareis puori koč vīnam nu tūs mozūs. Šaļtim skaitūt izīt smogums nu cik skaudra dzeivis materiala, bet gruomotys nūsaukums ir “Dzeiveiba”, i tys līcynoj, ka vyss gols golā vys tik pasavierš iz gaišū pusi. Itī ir stypruos Latgolys styprī stuosti.”

Ideja par latgaliskim radejis lasejumim jau pyrma laika roduos Latvejis Radejis Latgolys studejis vadeituojai Renātei Lazdiņai i Ilzis Spergys “Dzeiveiba” pasalics tam breineigs materials. Kaidā sarunā ar latgaliskūs projektu vadeituoju Edeiti Husari izlamts, ka varbyut taišni itys laiks i tuo īspiejis ir eistuo šaļts ideju eistynuot. Koč i stuostu kruojumā ir deveni literarī dorbi, radejis lasejumu variantā puortops pīci nu tūs, kotrys byus dzieržams gondreiž stuņdi garā īrokstā. Klausomajūs stuostūs sūpluok Latvejis Nacionaluo teatra aktrisis Ingys Misānis bolsam skanēs ari cytu leluoku i mozuoku īrunuotuoju bolsi. Vysu papyldynuos īroksta muokslinīcyskuo vadeituoja i režisora Kristapa Rasima radeituo muzyka.

Planavuots, ka radejis lasejumi Latvejis Radejis 1 eterā izskanēs ituo gods decembrī, taipat kotram grybātuojam tūs byus vareiba nūsaklauseit škārsteiklā kai Latvejis Radejis sātyslopā, tai latgalīšu kulturys ziņu portalā lakuga.lv. Stuostu kruojuma “Dzeiveiba” radejis lasejumi byus pyrmī piļneibā latgaliski īraksteitī lasejumi, kas izskaņ Latvejis Radejis eterā. “Dzeiveiba” īrokstus sajims ari Latvejis Naredzeigūs bīdreibys biblioteka i tuos filialis Latvejā, kab tī byutu daīmami i izmontojami iz vītys bibliotekuos.

Stuostu kruojuma “Dzeiveiba” radejis lasejumu verseja tūp ar Vaļsts kulturkapitala fonda programys “KultūrElpa” i Latvejis Radejis finansialu atbolstu.

Foto nu radejis lasejumu īroksta procesa: Amanda Anusāne

Pastuosti cytim!

Leave a Reply

Your email address will not be published. Required fields are marked *