Svātki i apsveikumi /Jureits

Kai pi svātku reizis, šudiņ pījamam apsveikumus i sveicīņus!

Lels paļdis Jureišam par lobim vuordim šudiņ i dorbim daudzu godu garumā!

 

Jureits (Jurs Viļums) ar apsveikumu i drupeit viesturis:

2005.goda julī tyka sareikuota dybynuošonys sanuoksme, kurymā tyka pījimts lāmums oficiali registrēt bīdreibu “Latgales Studentu centrs”. 2.novembrī tyka ari oficiali izdūta registracejis aplīceiba.

Pa itū laiku daudz kas sadareits: “Atzolys”, “Muzykys Skrytuļs”, bīdreibys nūsaukuma maiņa iz “Latgolys…”, ortografejis dzelu virziešona, viestules ministrejom, ekspedicejis iz Sibiri, muzykys koncertturneja “Made in Latgola/ Taiseits Latgolā”, čyguonūs īšonys, leiguošonys, “LaLaDra”, Susātivs… projekts projekta golā. Par tū vysu ir rakstejuse LaKuGa.LV i tagad aktivuo lgsc.lv lopa.
Eistineibā – lela prīca, ka tai veiksmeigi atsateistejuse suokūtneji daudzejim troka ideja 🙂
Paļdis Arvim Soldānam, kas podtureja dūmu par vajadzeibu registrētīs par oficialu bīdreibu, paļdis tīm padsmit studentim, kas itū vajadzeibu atbaļsteja 2005.goda julī bīdreibys dybynuošonys sanuoksmē. Paļdis Guntim Šmaukstelim, kas naatsaceja uzajimt vadeituoja omotu bīdreibys darbeibys suokumūs, paļdis Ilonai Zaicevai, kas naatlaideigi turpynova dorbu, i, prūtama līta, tagadejai vadeituojai – Ilzei Spergai, kas lelā mārā “vaineiga” pi tuo, ka bīdreiba ir tik aktiva i pasuokumi nūteik gondreiž caur dīnu! Eipašs paļdis Artim Loginam par vysu gruomatvedeibys i lītvedeibys dzelu kuorteibu! Paļdis visim tagadejim i īprīškejim biroju koordinatorim! Paļdis kotram LgSC bīdram i atbaļsteituojam, kas dora! Paļdis ari tīm LgSC idejis turātuojim, kas tū virzeja vēļ ilgi pyrms oficialuos izaveiduošonys.
Saulis myužu Latgolai i panuokumim boguotu atteisteibys ceļu bīdreibai “Latgolys Studentu centrs”!
P.S. Ar lapnumu varu raksteit sovā CV: “vīns nu bīdreibys LgSC dybynuotuoju” – tys varbyut tai formali skaņ, bet maņ eistyn cīš daudz nūzeimej!
Tagad drusku smīkleigai izaver vēļ 2004.goda seņtebra sarakste:


“Tys, ka tūs satutus vēļ var i vajag papyldynuot, ci puorstruoduot… pēc tam vēļ iztulkuot latgaliski, tod vēļ dabuot studentus, kam tys vyss interesej, pēc tam byus vēļ juosateikās ar nalobvieleigūs personu puormatumim par tū, ka itei vysa ideja ir galeiguokais māslys, tod vēļ kaids vīns attīs i maņ pasaceis – ziņ, a Tu vyspuor esi “job… čangaļs…” Atlaidit maņ par itaida sarkasma aileiti… ;->
Vysaiž ir bejs i vysaiž byus. Deļ tuo teik taiseiti statuti, lai kūpā visi – bejušī i asūšī – studenti varātu izsaceit sovys dūmys. As naasu Dīvs, i enģeļs ari naasu. As naasu struodovs LGI, naasu struodovs (vēļ) “Trešajā Zvaigznī”… ;-> As navaru zynuot vysu. Tak izejūt nu tuo, kū zynu, voi ruodīs, ka zynu… verūs, kai tū “mītu” (ar divejim ci vairuokim golim) ceļt augšā. Nu obejim vīnlaiceigi as paceļt navaru, tod nu ceļu nu vīna, ka ir kaids, kas grib dasavīnuot – lyudzu! Ci, ka rassīs pēc kaidys šaļtenis, kaids/a students/e, kas ari gribēs paleidzēt pi ceļšonys, tod jim vysmoz nabyus otkon juocyloj itys mīta gols, kurs munā pusī…
As daudz kuo nazynu. Tak es vēļ drupeit tycu, ka Latgolai ir nuokūtne, ka latgaļu volūdai i nuokūtne, ka LgSC (ari statutim) ir nuokūtne… Ka as tam vysam vairs naticiešu, tod vedit mani da kopu… ;-> i mīrs byus – tod varēs otkon vysi pa sovam pruotam dareit! ;->
Nasoku, ka zynu vysu, kai dareit. As tikai aicynoju īt paleigā, paļdis tīm, kas atsasauc.
Lai izadūd jyusim vyss, kas lobs! ;->

Tys, kū gribieju pasaceit – prīks, ka Tu cyloj tū mīta golu, tak redzīs, ka Tu dori tū vīns.
Paseņ atpakaļ, kod beja pirmuos Vosoruošonys, bedzomī Graidi, i ticeiba, ka kaida vysu (ar tū dūmoju ļauds, kurus kūpā turieja Latgolys ideja) dybynuota organizaceja dūs vajadzeigū “jumtu”, nabeja gona apzynuota vajadzeibys sajyuta darbuotīs dēļ OFICIALA studentu centra. Vēluok jau beja drupeiti baile nu otkon naizadūšonys. Eistyn lela dale ļaužu, kuri pīsadaleja ilgi, niu ir cīši skeptiski pret sevkaidu oficalu registriešanūs. Ari es pīdaru pi taidim – ir vajadzeiga PUORLĪCEIBA, ka registrātuo organizaceja nabyus vīn tukšs skons. Asu jau pīredziejuse (Naz cik reižu i ari poša iz sovys uodys).

var jau dareit tai pat – pameiginuot kaidu laiceni pastruoduot bez registriešonys. Tys nabyutu nikaids lelais grāks pret vaļsts lykumdūšonu. I piec tam jau – kaidus divejus mienešus vāluok, tod ari pīregistriet vysu, kai pīnuokas. “tikai kuorteibai ir juobyun!” ;->
Sovaižuok (atsakuortuošu) saīs, ka sevkurs students aizīs iz TV ci radio, ci vēļ sazyn kur i siss pi golda saceidams, jis ir golvonais nu visim Latgolys studentim, vot klausit jū. Piec tam otkon aij i pīruod, ka jis taids vīns vieja dzonuotuojs, a puorejī normali.
.
.

Naapmoksuota reklama:

Ka meklej apsveikumus latgaliski, ej iz LaKuGu!

Paleigs tim, kas apsveikumus gryb raksteit latgaliski

.

http://lakuga.lv/apsveikumim/

.

 

.

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.