SPĀKA LAB. Idejis Latgolys unikalitatis izmontuošonai i pozicioniešonai
Catūrtdiņ, 23. novembrī, Preiļūs nūtyka rodūšūs seminaru cykla “SPĀKA LAB” seminars, kura mierkis beja īsavuiceit izmontuot kotrys vītys unikalitati jaunu kulturys ideju radeišonā, kai ari raudzeit izdūmuot, kai 2025. godā varātu svieteit Latgolu i tuos vierteibys – kai iz vītys Latgolā, tai uorpus tuos.
“SPĀKA LAB” seminarā “Kur dabuot ideju sovai kulturtelpai i kai Latgolu svinēt 2025. godā?” beja aicynuoti pīsadaleit Latgolys kulturys īstuožu i organizaceju, navaļstiskūs organizaceju puorstuovi i cyti interesenti, kuru vydā ari jaunīšu programys “LTG tu dū!” dalinīki. Seminarā namaterialuos kulturys montuojuma centra “Upīte” direktors Andris Slišāns deve īskotu, kaidi lobumi i aizdavumi ir pošam sovā kulturtelpā, Latvejis Nacionaluo kulturys centra Viesturiskūs zemu i namaterialuos kulturys montuojuma nūdalis vadeituoja Jana Vērdiņa pīduovuoja plotuok izzynuot Latvīšu viesturiskūs zemu lykumu, tuo īspiejis, Siguldys nūvoda Kulturys centra vadeituoja Jolanta Buorīte (Borīte) stuosteja par tū, kaidi ir izaicynuojumi i īspiejis, Latvejā reikojūt jaunu festivalu, bet Ideju i inovaceju instituta dybynuotuoja Elīna Mikelsone (Miķelsone) paleidzēja saprast metodis, kai radeit jaunys idejis kulturā. Lektoru stuostus var nūsavērt ite:
Seminara ūtrajā daļā, īprīšk dasasokūt, organizacejis/īstuodis/interesenti beja aicynuoti ar eisim stuostim pasadaleit ar sovim veiksmeigajim/drūsmeigajim pīmārim, struodojūt kulturā Latgolā voi latgalīšu kulturā ari uorpus Latgolys – ar sovim stuostim pasadaleja “Giut breidi” puorstuove Līga Springa, stuostūt par pyrmū latgaliskū plānuotuoju, Nautrānu pogostu apvīneibys kulturys pasuokumu organizatore Inga Vigule stuosteja par latgaliskajom idejom Rēzeknis nūvoda kulturys nūtikšonuos, bet latgalīšu kulturys kusteibys “Volūda” vadeituoja Edeite Laime pasadaleja ar Latgolys kongresa dīnys svieteišonys akceju Latvejis radeju stacejuos 2023. gods aprelī.
Turpynuojumā seminara dalinīki grupu dorbā pīsadaleja ideju vātrā par tū, kai Latgola varātu sevi pozicionēt i kū pīduovuot svieteit 2025. godā kai iz vītys viesturiskajā zeme, tai cytuvīt Latvejā i pasaulī. Idejis, kas roduos, par pīmāru, ir skumūs dzīšmu festivala sareikuošona, dūt vareibu Latgolai skanēt, kur kotra vīta izdūmoj, kas tei par skaņu varātu byut, izceļt kaida tipa personeibys i tūs stuostus, par pīmāru, rakstnīkus, metalkaliejus voi cytus.
Seminaru “SPĀKA LAB” reikuoja latgalīšu kulturys kusteiba “Volūda” i bīdreiba “New East”, sasadorbojūt ar Preiļu nūvoda pošvaļdeibu i Latgolys Turisma asociaceju. Pasuokuma nūrisi pabaļsteja Latvejis Republikys Kulturys ministreja, Latvejis Nacionalais kulturys centrs, kai ari Sabīdreibys integracejis fonds.
Fotogalerejā: īsavieršona “SPĀKA LAB” Preiļūs, foto Amanda Anusāne/latgalīšu kulturys kusteiba “Volūda”
Seminars beja daļa nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
