Aizvadeita diskuseja par literaturu latgaliski i tuos potencialu medeju vidē i tulkuojumūs
Pyrmūdiņ, 4. decembrī, Reigā, kulturvītā “Volūdu sāta” nūtyka saruna-diskuseja ap raksteišonu latgaliski i tulkuojumim, kurā pīsadaleja kai latgalīšu literati, tai tulkuotuoji i medeju puorstuovi.
Lai veicynuotu literarū procesu Latgolā i latgaliski raksteitūs tekstu radeišonu Latvejā, jau catūrtū reizi latgalīšu kulturys kusteiba “Volūda” (bīdreiba “LgSC”) izsludynuoja konkursu “Latgolys prozys skaitejumi”. Itūgod, lai dagrīztu leluoku viereibu literaturai latgaliski, nūtyka naviņ prozys skaitejumu nūslāguma pasuokums Rēzeknē, bet ari kulturvītā “Volūdu sāta” beja literaturzynuotnīka Valentina Lukaševiča lekceja ap latgalīšu literaturys viesturi i tai veļteituos literatu stuostu sadalis portalā lakuga.lv prezentaceja, kai ari saruna-diskuseja ap raksteišonu latgaliski i tulkuojumim “Es rokstu, bet voi tu skaiteisi?”.
Reikuot diskuseju “Es rokstu, bet voi tu skaiteisi?” latgalīšu kulturys kusteibu “Volūda” motivēja vēļ arviņ navīnnūzeimeiguo atsatīkšona pret literaturys latgaliski publiciešonu kulturmedejūs Latvejā, tok reizē ari pīaugūšuos aktivitatis latgaliskuos literaturys tulkuošonā i izskaniešonā cytuos pasauļa volūduos. Diskusejā pīsadaleja literati Ilze Sperga, Aldis Bukšs, Valentins Lukaševičs, literaturzynuotnīks Jānis Vādons i ar video īraksteitu komentaru ari volūdnīks, tulkuotuojs, “Volūdu sātys” vadeituojs Snorre Karkonens-Svensons. Sarunu-diskuseju vadeja latgalīšu kulturys ziņu portala lakuga.lv redaktore Laura Melne.
Sarunā-diskusejā pasaruodeja itaidi punkti kai problemys i izaicynuojumi, pi kuru, lai latgalīšu volūda vaira pasaruodeitu ari literaturys vidē, byutu juostruodoj:
- Raksteit latgaliski apgryutynoj volūdys zynuošonu tryukums (navuiceišona školā) i volūdys veiduošonuos process, kurā ir cīši daudzi redzīņu; autors navar breivi ļautīs tekstam.
- Sevkurai volūdai (jo eipaši mozuok lītuotajom) interesis i skaiteituoju veicynuošonai par lobu īt “bestseleru” tulkuošona unikali taišni tamā volūdā;
- Literaturys publicistikys izdeviejim i portalim vajadzātu atsasēst pi vīna golda, vīnojūtīs, kaids ir pastatejums tekstu publiciešonai latgaliski, lai kotra reize nav juoviertej individuali i ar beišonūs, kai reagēs skaiteituojs;
- Literarūs dorbu publiciešonu izdeviejum latgaliski apgryutynoj profesionaļu (redaktori, korektori, volūdys specialisti) i pošu zynuošonu tryukums;
Ite var nūsavērt “Volūdu sātys” vadeituoja Snorris Karkonena-Svensona video komentaru par literaturys tulkuošonys temu.
Fotogalerejā diskuseja “Es rokstu, bet voi tu skaiteisi?”, foto Edeite Laime/latgalīšu kulturys kusteiba “Volūda”
Prozys skaitejumu diskuseja “Es rokstu, bet voi tu skaiteisi” ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.