Muzykali akustiski latgalisks koncerts „Rudiņs skanis”
Atsaļausam apgalvuot, ka Reigā koč kas itaids byus pyrmū reizi – akustisks koncerts rudeneigi latgaliskā nūskoņā, pretendejūt iz nūpītnuokys latgalīšu muzykys statusu. Pīsadola Latgolys jaunīšu kuors „Sono juvenis”, vokali instrumentaluo grupa „Rudiņs steigys” i, ka dreikst tai saukt, dzīsminīks Kārlis Strūbergs. Tys vyss – Latgolys Studentu nedelis ītvorūs ar mierki, paruodeit, kū i kai Reigā dora Latgolys muzykalī jaunīši, kurim daudzim muzyka niu ir vaira kai viņ aizaraušanuos i sirdslīta. Daudzim nu jim muzyka ir profeseja i jiusu prīškā byus nuokušī/jau asūšī kuoru vadeituoji, profesionali dzīduotuoji i komponisti, kas Latgolys vuordam nūteikti liks skanēt na viņ Latvejis, bet vysa pasauļa koncertzalūs!
Koncerts „Rudiņs skanis” – 15. septembrī LU Mozajā Aulā (Raina bulv. 19, Reigā) 18 stuņdēs.
Koncerta dalinīki:
Sono juvenis
„Sono juvenis” ir pyrmais latgalīšu kuors Reigā. Dzims 2010. goda februarī, zivs zeimē. Kai jau zivs, tyvuok pi iudinim, nu Latgolys azarim tyvuok jiurai. Vysi kūra dalinīki ir latgalīši, kas studej, struodoj ci ir puorsacālušs iz dzeivi Reigā. Dzīduot prīca latgalīšam reši kod spiej izzust, deļ tuo mes apsavīnovom, vysi dzīduot gribūšuokī i talanteiguokī Reigys latgalīši. Juopībiļst, ka na tik kuorī, bet ari dzeivē vysi asom lobi draugi. Repertuars pagaidom navā vēļ cīši plašs, aiz tuo, ka asam jauns kolektivs, nu prīškrūku vālamīs dūt Latgolys komponistu dorbim. Asam cīši radūšu cylvāku komanda i nav šaubu, ka iz prīšku izpiļdeisam ari pošu kūristu komponātus dorbus. Kuora pamatbyuteiba ir latgalīšu gora kūpeiba Reigā, kas pasaruoda gon nūpītnuos, gon, vysu bīžuok, na tik nūpītnuos izpausmēs. Kuora muzykaluo virsvadeiba uzticāta Baibys Urkys i Jaroslava Poļakova rūkom, nu myusu komandys sastuovā ir ari daudzi rodūši cylvāki i profesionali muziki, deļ tuo teik uzklauseitys sevkura tuos dalinīka dūmys, kas radūšū procesu dora daudz interesantuoku. Tys eistais kuora nūsaukums pagaidom myus vēļ nav atrads, deļ tuo iz itū šaļti saucamīs „Sono juvenis”, kas nu latīņu volūdys nūzeimoj „dzīdūšuo jaunatne”. Dzīžūt, myusu golvonais vadmotivs ir byut kūpā ar sovim nūvodnīkim i jautri pavadeit laiku.
Rudiņs steigys
Grupys pyrmssuokumi meklejami 2003. goda rudinī, kod grupys dalinīki sasatyka Juoņa Ivanova Rēzeknis muzykys vydsškolā. Kai jī poši soka – jī pīdzima rudini i vysim instrumentim, kū jī suokumā spielēja, beja steigys – nu tuo ari nūsaukums „Rudiņs steigys”. Grupa izpilda pošu sacarātys /aranžātys dzīsmis. Vīna nu popularuokajom grupys dzīsmem ir „Rudiņs steigu” dalineicys Lienis komponātuo „Laimeņa” (latgalīšu tautys dzīsmis teksts), kas sovulaik īgivuse nadaleitu Latgolys Radejis klauseituoju atzineibu. Gondreiž vysu grupys dalinīki niu studej Jāzepa Vītola Latvejis Muzykys akademejā i „Rudiņs steigys” pamatuoti var saukt par pyrmū piļneigi profesionalū muzykys grupu nu Latgolys.
Pasaklausi – itai skaņ „Rudiņs Steigys”
Kārlis Strūbergs
20 godus vacs jaunīts nu Varakļuonim, kas niu studej Reigā, Latvejis Kulturys akademejā. Pots soka, ka muzyka ir juo meiluokuo nūdorbe šudiņ i nu tim laikim, kūpš sevi pīmiņ. Pošu reizi spielej vairuokuos muzykalajuos apvīneibuos („Crust”, „Inde Indive”, In the Box” i „Momend”), kas izpilda dzīsmis dažaiduos volūduos (latviski, angliski, latgaliksi), bet „Rudiņs skaņuos” Tev, klauseituoj, byus īspieja dzierdēt Kārli absoluti akustiskā izpiļdiejumā – dūmojams, ka dreikstātu saceit: jauns latgalīšu dzīsminīks.