Zinis nu Jelgovys biroja

Oktobra vydā, kod vysi studenti jau saprūt, ka ir īzasuocs jaunais studeju gods i vosora ir paguojuse, Latgolys Studentu centrs uzreikuoja izgleitojūšu latgalīšu pasuokumu, prūti, 16. oktobrī iz Jelgovu tyka paaicynuota latgalīšu raksteibas lītpratieja Muora, kurei pavuicieja vysim gribātuojim latgalīšu raksteibys pamotus.

Kaut ari paguojušajā godā Muora jau gastieja Jelgovā i vuicieja studentim latgalīšu volūdys pamatus, daudz kas beja aizamiersts. Cytim sovpus šūgod beja pyrmuo pīredze šymā jūmā. Bet jebkurā gadiejumā vysim šei vuiceibys stuņde deve tikai īgivumus. Beja cīši interesanti izzynuot, kai tod pareizi juoroksta daudzi vuordi, kai ari interesanti ir tys, ka ari latgalīšu volūdā ir tik daudz pareizraksteibys lykumu, par kurīm ikdīnys saskarsmē daudzi pat naaizdūmoj. Prīks ari par tū, ka Muora kompetenti atbiļdieja ari iz uzdūtajim studentu vaicuojumim.

Piec nūdarbeibys mes saprotom, ka ir svareigi zynuot vysmoz pamatus sovys dzymtuos volūdys pareizraksteibā, lai tū varātu izkūpt i īvuicēt ari nuokamajom paaudzem, i vēļ par tū, lai latgalīšu volūda naizzustu i saglobuotu sovu unikalitati.

 

Atejūt pelieceigi rudineigajam laikam dobā, gribīs vysmoz, kab sirdī i dvieselē dzeivuotu kruosainums i jautreiba! Deļtuo 5. novembrī LgSC Jelgovys birojs uzreikuoja vīnu pateikamu pasuokumu „Syltys dzīsmis dvieselei” jeb sovaižuok sokūt – dzīsmu vokoru.

Leidza pajamūt grūzeņu, lobu gorastuovūkli, i golvanīs – dzīduotgrybu, visi interesenti sasalasieja vīnkūpus, kab izbaudeitu muzykalū pasuokumu. Itys vokors pīsaistieja ari jaunus aktivistus. Vokora gaitā gitarys pavadejumā jautri tyka izdzīduotys daudzys gon latgalīšu, gon latvīšu dzīsmis. Izspielējom ari kaut kū leidzeigu kuodreiz popularajai puorraidei „Dzīsmu duelis”, dzīdūt doncuojom i vēļreiz dzīduojom!

Itys nūteikti beja jauki pavadeits rudeneigs vokors i puse nakts! Kai jau īrosts – Jelgovys latgalīšu kūpā byušona vīnmār puorsavierš par jautru padareišonu!

 

Olita,

Jelgovys LgSC birojs