Rss Feed Tweeter button Facebook button Youtube button
Latgolys Studentu centrs
Portals lakuga.lv viestej par latgaliskū kulturu
Categories: Bez kategorejis

“Latgalīšu kulturys ziņu portals lakuga.lv” kas dīnys viestej par latgaliskū kulturu Latvejā i pasaulī. Tys da šam ir vīneigais medejs, kura saturs teik sagataveits tikai latgalīšu rokstu volūdā – viesturiskā latvīšu volūdys paveidā. Portalam lakuga.lv ir lela nūzeime na viņ latgalīšu volūdys, bet ari latgaliskuos identitatis saglobuošonā.

Portalā lakuga.lv var skaiteit par latgaliskuos kulturys aktualitatem, jaunumim muzykā, literaturā, muokslā i cytuos jūmuos. Lakuga.lv pīduovoj izzynuot par Latgolys viesturē zeimeigom personeibom i nūtikšonom, intervejuos īpazeit spylgtys personeibys, kai ari aktualizej vaicuojumu par latgalīšu volūdys izmontuošonu dažaiduos jūmuos.

“Latgalīšu kulturys ziņu portala lakuga.lv” redaktore Sandra Ūdre uzsver:

“Viņ regularys lītys var saglobuot latgalīšu rokstu volūdu i kulturu augstā leiminī. Simboliski runojūt, pasuokumi, gruomotu izdūšona, pat atseviški radejis i televizejis raidejumu cykli ir tikai epizodiski spūdri uzplaiksnejumi vīnā šaļtī, latgaliskuma seikstū dzeiveibu nūtur cauri godim nagaistūša guņs. Lakuga.lv ir taids puorts voi guņskurs jau 12 godus.”

Lakuga.lv saturs ir saistūšs na tikai Latvejis īdzeivuotuojim, tok latgaliskuos kulturys interesentim vysā pasaulī. “Lakuga.lv ir sovs fanu puļceņš, kas kotru jaunu ziņu sagaida ar interesi; ir taidi, kas portalu attaisa kod nakod; goduos, prūtams, gadejuma skaiteituoji – te atrūnama gona daudzveideiga informaceja. Tys leluokais izaicynuojums ir palikt vēļ interesantuokim saturā, augt kvalitatē,” uzsver portala redaktore.

“Latgalīšu kulturys ziņu portals lakuga.lv” dorbojās jau nu 2007. gods. Portala eipašnīks, bīdreiba “Latgolys Studentu centrs”, juo darbeibu nūdrūsynoj, pasateicūt projektu konkursūs sajimtajam finansiejumam. Pārņ lakuga.lv pīdzeivuoja vairuokys izmainis – portals tyka registrāts kai medejs i tam tyka izveiduots jauns logo i sātys lopa, padorūt nū modernuoku i lītuotuojim ārtuoku. Itūšaļt lakuga.lv darbeiba teik nūdrusynuota ar Vaļsts kulturkapitala fonda atbolstu, tok nu septembra portala saturs tiks sagataveits, pasateicūt Regionalūs i vītejūs medeju atbolsta programā sajimtajam finansiejumam.

Informaceju sagataveja:
Vineta Vilcāne
“Latgalīšu kulturys ziņu portals lakuga.lv” atteisteibys projektu vadeituoja

Pastuosti cytim!

Leidzeigī roksti:

Leave a Reply