Ontona dīnā byus pyrmais golda spēlis “Čipierkstneits” čempionats

Ontona dīnā byus pyrmais golda spēlis “Čipierkstneits” čempionats

Trešdiņ, 18. janvarī, 12.20 stuņdēs Bolvu nūvoda Rekovā nūtiks pyrmais jaunuos golda spēlis “Čipierkstneits” čempionats, reizē ar Ontona dīnys sviniešonu aizsuocūt folklorista, nūvodpietnīka i dzejnīka Ontona Slišāna (1948–2010) 75. jubilejis goda nūtikšonys.

Iz 18. janvara pasuokumu eipaši aicynuoti byus školāni, kuri kai poši pyrmī varēs izspēlēt jaunū golda spēli latgaliski “Čipierkstneits”, kai ari piečuok dzierdēt latgalīšu hip-hop muokslineicys Ūgys uzastuošonu. Pyrmajā “Čipierkstneiša” čempionatā pīsadaleis pīcu školu komandys.

Ituos reizis “Ontona dīnas ļustes” plānuotys kai Ontona Slišāna 75. jubilejis goda aizsuokums – dažaidi Slišānam veļteiti pasuokumi byus vysu godu, nūsaslādzūt 28. decembrī, kod nūvodpietnīks byutu svietejs sovu 75. dzimšonys dīnu. Ontona dīnys sviniešona Bolvu nūvoda Upītē pyrmū reizi nūtyka 2015. godā ar sliepu puorguojīni “Raibī panti”, tai piečuok puortūpūt par “Ontona dīnas ļustem”.

Īprīšk “Ontona dīnas ļustes” vysod beja ari Ontonam Slišānam veļteituo rodūšūs dorbu konkursa nūslāgums, nu pārn, tuo breiža epidemiologiskūs īrūbežuojumu deļ, pasuokums nūtyka 16. majā, kod dzimšonys dīnu byutu sviniejuse Ontona Slišāna dzeivisbīdre, školotuoja Irēna Slišāne. “Ontona dīnas ļustes” reikuotuojs, Namaterialuos kulturys centrs “Upīte” direktors Andris Slišāns soka: “Itūgod rodūšūs dorbu konkursu, kurā teik gaideiti kuo zeimiejumi, tuo rokstu dorbi, izsludynuosim 18. janvarī “Ontona dīnas ļustēs”, bet nūslāgumu tuopat kuo pārn reikuosim 16. majā, simboliski caur konkursu otkon ļaunūt sasatikt Ontonam i Irenai.”

Jaunuo golda spēle “Čipierkstneits”, kuru pyrmajim byus vareiba redzēt i izspēlēt Ontona dīnys pasuokuma apmaklātuojim, ir pyrmuo itaida veida – zynuošonu, aizdavumu, atjauteibys i ari veiksmis – spēle latgaliski. Spēlis autore ir Jolanta Keiša, kurys dzymtuo puse ir Bolvu nūvoda Škilbāni, bet pi tuos izdūšonys tolkā guojušys bīdreibys “Upītes jauniešu folkloras kopa” i latgalīšu kulturys kusteiba “Volūda”.

Spēlis nūsaukuma “Čipierkstneits” ideja pajimta taišni nu Ontona Slišāna dailradis – tys ir četrūs pierstūs pajemams daudzums, latvīšu literarajā volūdā – šķipsniņa. Taida i ir spēlis ideja – čipierkstneits latgaliskuma, zynuošonu, informacejis i sajiutys kūpā ar spēlis bīdrim. Spēlis autore Jolanta Keiša piec izgleiteibys ir filologe i dizainere, bet ideja par golda spēli latgaliski jai roduos 2021. godā kai studeju dorbs. Iz spēlis laukuma izlyktys dažaidys myusdīnu i senejuoku laiku Latgolys kulturys vierteibys – kai objekti, tai ļauds, pamatūt līceibys par Latgolys dažaidū kulturviesturi.

Golda spēli “Čipierkstneits” jau niu kotrs grybātuojs var nūpierkt īprīškpuordūšonā latgalīšu kulturys kusteibys “Volūda” zīduošonys platformā-veikalā voluda.lv. Cikom daīmami byus viņ 50 spēlis eksemplari.

Ontona dīnys svātku pasuokumu “Ontona dīnas ļustes” organizej Namaterialuos kulturys centrs “Upīte”, sasadorbojūt ar kulturys centru “Rekova” i latgalīšu kulturys kusteibu “Volūda”. Spēlis “Čipi

Pastuosti cytim!

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.