Latgolys kulturys darbinīkus aicynojam iz seminarim komunikacejis i nūvodpietnīceibys prasmu styprynuošonai
Janvara golā, 20. janvarī Daugovpilī i 27. janvarī Kuorsovā, Latgolys kulturys darbinīkus i navaļstiskūs organizaceju puorstuovus aicynoj iz izgleitojūšim seminarim komunikacejis i nūvodpietnīceibys prasmu styprynuošonai “SPĀKA LAB”. Kotrā nu seminaru byus vareiba dzierdēt treis attīceiguos sferys praktiku i profesionaļu stuostus, kai ari pasuokumu ūtrajā daļā paradzātys diskusejis par tuos pošys temys vaicuojumim, portalu informej nūtikšonu puorstuovi.
Pīktdiņ, 20. janvarī, 15 stuņdēs Daugovpilī nūtyks pyrmais seminars “SPĀKA LAB. Prasmeiga kulturys komuniaceja: stuosteit par nūtikšonu tai, kab izzynoj sābru Juoņs i DELFI redaktors”, kurā kulturys darbinīkim (kulturys nomu, biblioteku, muzeju i cytu īstuožu) i navaļstiskūs organizaceju puorstuovim byus vareiba styprynuot asūšuos i dabuot jaunys zynuošonys komunikacejai par pošu taiseitim pasuokumim, projektim i organizaceju kai taidu digitalajā vidē i saziņā ar medejim, kai ari par latgalīšu rokstu volūdys īspiejom publicitatē. Seminara lektori: digitaluos satura agenturys “New Black” rodūšuo direktore Vladislava Romanova, portala DELFI golvonuo redaktora vītinīks Jānis Bagātais i latgalīšu kulturys ziņu portala lakuga.lv vadeituoja Edeite Husare. Sasatikšonys ūtrajā daļā 18 stuņdēs byus diskuseja “Myusu dīnu Latgola: laikmeteiguo i (na)saprastuo?”, kurā kulturys, medeju i komunikacejis specialisti diskutēs par myusdīnu Latgolys pozicionejumu kulturā. Daugovpiļs seminara programa daīmama ite: https://ej.uz/SPAKA_LAB_Daugovpils.
Bet pīktdiņ, 27. janvarī, 11 stuņdēs Kuorsovā byus seminars “SPĀKA LAB. Prasmeiga nūvodpietnīceibys strategeja: kai atrast pasauļa centru sovā sātā”, kurā byus vareiba paplašynuot prīškstotus par vītu eipašūs stuostu atrasšonu, strategeju i populariziešonu, kai ari par vītys identitatis veiduošonūs. Seminara lektori: dūmneicys “Think Tank Creative Museum” vadeituoja, izdavumu serejis “Kārsavas stāsti” veiduotuoja Ineta Zelča Sīmansone, bīdreibys “Hronologeja” puorstuovi, Latgolys viesturis stuostim veļteitūs izdavumu autori viesturnīks Kaspars Strods i literate Ligija Purinaša, kai ari Vydzemis Augstškolys asociātais profesors, identitašu pietnīks i TV raidejuma “Tas notika šeit” vītu stuostu atkluojiejs Gatis Krūmiņš. Pasuokuma ūtrajā daļā 14.30 stuņdēs byus diskuseja “Vīta Latgolā: maineibā i (pī)rūbežā?”, kurā nūvodpietnīceibys, vītu identitatis, turisma i pošvaļdeibu puorstuovi diskutēs par aspektim, kas puormej i ītekmej Latgolys i tuos vītu identitati. Kuorsovys seminara programa: https://ej.uz/SPAKA_LAB_Kuorsova.
Dažaidom temom veļteiti rodūšī seminari, kas vierzeiti Latgolys regiona kulturys dzeivis organizātuoju i navaļstiskūs organizaceju puorstuovu kapacitatis styprynuošonai, nūtiks jau trešū reizi. Ituo gods rodūšūs seminaru koncepcejā “SPĀKA LAB” īkodāta kai gribiešona styprynuot regiona spākus kulturys laukā, tai ari rodūšuo laboratoreja, kurā ar sarunom i diskusejom var rūsynuot jaunu ideju dzimšonu i raudzeišonu atrast ceļus tūs eistynuošonai.
Seminaru nūtikšonu atbolsta Latvejis Nacionalais kulturys centrs, bet tūs reikoj latgalīšu kulturys kusteiba “Volūda” i bīdreiba “New East”, sasadorbojūt ar bīdreibu “Latgaļu sāta”, bīdreiba “Latgolys Producentu Grupa” i Ludzys nūvoda pošvaļdeibu.
Obeji seminari nūtiks kluotīnē i interesentim byus daīmami bez moksys. Seminaru diskuseju daļom tiks nūdrūsynuota ari tīšraide. Pīsasaceišona Daugovpiļs seminaram par komunikaceju vālama da 18. janvara ITE, bet Kuorsovys seminaram par nūvodpietnīceibys strategeju da 25. janvara ITE. Grybātuoji anketā var atzeimuot, voi byus vajadzeigs LNKC aplīcynuojums par pīsadaleišonu seminarā. Taipat nūtikšonu reikuotuoji lyudz jimt vārā, ka obejūs seminarūs vītu skaits īrūbežuots.