LgSC pīsadaleis apvuiceibuos “Breineiguos volūdys i kur juos atrast”
![](https://lgsc.lv/wp-content/uploads/2019/04/Bova_-_View_from_Palizzi_-_Photo_by_Filippo_Parisi-1024x683.jpg)
Nu 12. leidz 17. apreļam Bovā, Italejā nūtiks apvuiceibys “Breineiguos volūdys i kur juos atrast” (Fantastic Languages and Where to Find Them). Tuos nūteik projekta “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (Minority Languages, Major Opportunities. Collaborative Research, Community Engagement and Innovative Educational Tools — COLING) ītvorūs.
Apvuiceibys nūtiks Kalabrejis regionā, tymā ītylpst pīcys pošvaļdeibys, kurymuos daži simti cylvāku vēļ da myusu dīnu runoj senejā grīķu volūdys variantā – greko volūdā. Itūšaļt greko volūda ir cīši apdraudāta i pādejuos desmitgadis vītejuos kūpīnys daudzi dora volūdys atdzeivynuošonai.
Ar sovu pīredzi daleisīs ap 20 mozuoklītuotūs volūdu ekspertu nu vysa pasauļa, eipašu uzmaneibu veļtejūt greko volūdai. Latgalīšu volūdu puorstuovēs Vineta Vilcāne i Kristīne Pokratnīce nu “Latgolys Studentu centra”.
Apvuiceibu mierkis ir atbaļsteit vītejū kūpīnu centīņus volūdu atjaunuošonā, daleitīs ar lobuos praksis pīmārim i atrast jaunus veidus, kai rysynuot ortografejis standartiziešonys, vuordu aizgiušonys i jaunvuordu darynuošonys problematiku.
![](https://lgsc.lv/wp-content/uploads/2019/04/1-1024x688.jpg)
![](https://lgsc.lv/wp-content/uploads/2019/04/2-1024x688.jpg)
Projekta aktivitatem var leidza sekuot Facebook.com i Twitter.com.