Latgolys kulturys programā 2021 apstyprynuoti treis LgSC projekti
Nūsaslēdzs Latvejis vaļsts mežu i Vaļsts kulturkapitala fonda Latgolys kulturys programys 2021. goda projektu konkurss i 30. aprelī tyka paziņuoti atbaļsteitī projekti, kuru vydā ari treis bīdreibys “LgSC” projekti.
Bīdreiba “LgSC” Latgolys kulturys programā 2021. godā beja īsnēguse pīcus latgaliskuos kulturys projektus. Programys atbolstu sajēme i 2021. godā tiks eistynuoti itaidi projekti:
Ilzis Spergys dzejis kruojums “Rudiņa bolsi”. Projekta mierkis ir veicynuot kvalitativys i jaunys literaturys latgaliski izdūšonu. Ilze ir vīna nu spieceiguokūs myusdīnu latgalīšu literatu. “Rudiņa bolsi” byus pyrmais Ilzis Spergys dzejis kruojums, tymā tiks apkūpuoti vaira nikai desmit godu laikā saraksteitī dzejūli pīaugušajim. Dzejis kruojumu paradzāts izdūt 500 eksemplaru tiražā, kruojuma redaktore byus literate Anna Rancāne. Sajimtais finansiejums 2500 €, projekta vadeituoja Kristīne Pokratniece.
Gruomotys “Līvānu novads tradīcijās, dziesmās un stāstos” izdūšona. Izdavuma mierkis ir Leivuona apleicīnis tradicionaluos kulturys montuojuma apkūpuošona i mutvuordu folklorys montuojuma izceļšona. Gruomotys sastateituojs – Mairis Iesalnieks, redaktore Ilze Sperga. Sajimtais finansiejums 4000 €, projekta vadeituojs Mairis Iesalnieks.
Mobiluos lītuotnis latgalīšu volūdys apgivei izstruode. Projekta mierkis ir veicynuot sabīdreibys izpratni par latgalīšu volūdu, tuos nūzeimi Latgolys kulturvidē i veicynuot latgalīšu rokstu volūdys raksteitprasmis leimiņa pīaugumu. Izgleitojūši izklaidejūšuo lītuotnē byus daīmama Android operātuojsistemā. Sajimtais finansiejums 4000 €, projekta vadeituoja Vineta Vilcāne.
Atbolstu projektu konkursā nasajēme nivīns nu obeju projektu, kas beja paradzāti latgalīšu kulturys ziņu portala lakuga.lv darbeibys atteisteišonai i paplašynuošonai.
Itūgod projektu konkursā tyka īsnēgti 142 projekti ar kūpejū pīprasejumu 525 tyukstūšu eiro apmārā, bet atbolstu konkursā sajēmuse taišni puse – 71 projekts 155 tyukstūšu eiro apmārā. Projektus Latgolys kulturys programā itūgod izviertieja komiseja sešu cylvāku sastuovā – treis eksperti nu Latgolys regiona, diveji Vaļsts kulturkapitala fonda puorstuovi i vīns puorstuovs nu Zemkūpeibys ministrejis. Vaira informacejis par Latgolys kulturys programys 2021 rezultatim ITE.
