Ar Medeju atbolsta fonda paleigu lakuga.lv eistynuos divejus projektus

Ar Medeju atbolsta fonda paleigu lakuga.lv eistynuos divejus projektus

Nūsaslēdzs Medeju atbolsta fonda (MAF) programys projektu konkurss nacionalūs i regionalūs medeju projektu eistynuošonai, viestej Sabīdreibys integracejis fonda izziņuotuo informaceja. Programā atbaļsteiti 45 projekti, kurūs vydā ari divejis bīdreibys “LgSC” uzturātuo i veiduotuo Latgalīšu kulturys ziņu portala lakuga.lv īceris.

Konkursā “Regionalūs i vītejūs medeju atbolsta programa”, kurys finansiejums ir nu Latvejis Republikys Kulturys ministrejis daškiertūs leidzekļu, nu 53 projektu dasacejumu atbolstu sajēmuši 45 projekti aba 85 % nu vysu dasaceitūs projektu, sajemūt nūlykumā nūsaceitū minimali vajadzeigū punktu skaitu i atbiļsteibu viertiešonys kriterejim, daīmamū finansiejumu proporcionali sadolūt storp vysim dasacejumim. Kūpā apstyprynuoti projekti 536 886 eiro vierteibā, nu tūs 66 886 eiro daškierti taišni Latgolys regiona medejim, nūdrūsynojūt regiona īdzeivuotuojim kvalitativu i sabīdryski nūzeimeigu politikys, ekonomikys voi kulturys nūtikšonu paruodeišonu i padzilinuotu procesu skaidruojumu.

Projektu dasacejumus piec atbiļsteibys i kvalitatis viertieja komiseja, kuruos vydā beja četri augstškolu puorstuovi (ari nu regionalūs augstškolu), vīns medeju sferys navaļstiskuos organizacejis puorstuovs, kai ari četri vaļsts puorvaļdis instituceju puorstuovi, nu kurūs divejis beja Kulturys ministrejis delegāti puorstuovi, vīns Nacionalūs elektroniskūs plašsazinis leidzekļu padūmis delegāts puorstuovs, taipat vīns Sabīdreibys integracejis fonda puorstuovs vadeja komisejis dorbu, nu viertiešonā i bolsuošonā napīsadaleja.

Kategorejā “Sabīdryski nūzeimeigs saturs” atbolstu sajiems bīdreibys “LgSC” projekts “Latgaliskā kultūrtelpa: problēmas, analīze un atspoguļojums portālā lakuga.lv” ar finansiejumu 12643,08 € apmārā, bet kategorejā “Latgolys regions” atbaļsteits bīdreibys “LgSC” projekts “VĪTA” ar finansiejumu 4822,52 € apmārā.

Obeji projekti tiks eistynuoti car Latgalīšu kulturys ziņu portala lakuga.lv platformu. Projektā “Latgaliskā kultūrtelpa: problēmas, analīze un atspoguļojums portālā lakuga.lv” paradzāts sagataveit saturu latgalīšu rokstu volūdā, kas paleidzēs styprynuot i atteisteit izpratni i zynuošonys par latgaliskū kulturtelpu. Projektā tiks sagataveiti 44 roksti, intervejis, pietejumi i skaidruojumi taiduos rubrikuos kai “Lakuga.lv vaicoj”, “Lakuga.lv pietej”, “Pa latgalīšu pādim” i “Īpazeisti latgalīšu volūdu”, taipat pyrmū reizi tiks taiseitys latgaliskuos kulturys viests video formatā, paradzūt sešu raidejumu publiciešonu. Portala sagataveitī roksti sešys reizis byus publicāti ari laikrokstā “Vietējā Latgales Avīze” i treis reizis žurnalā “A12”. Projekta eistynuošona sūpluok sabīdreibys informiešonai i izgleituošonai par latgaliskuos kulturytelpys vaicuojumim, ļaus stabilizēt, styprynuot i atteisteit ari poša portala darbeibu. Projektā īsaisteita vysa portala lakuga.lv redakceja – redaktore Sandra Ūdre, žurnaliste Sintija Augustova, kai ari žurnaliste i socialūs medeju redaktore Edeite Husare.

Ūtrys MAF apstyprynuotais bīdreibys “LgSC” projekts i portala lakuga.lv komandys raudzeišona paplašynuot portala darbeibu. Projektā “VĪTA” portals raudzeis skaidruot, kaidys izmainis Latgolys regionā ness jaunuo administrativi teritorialuo reforma taišni regiona mozajom vītom. Tys tiks dareits car trejim video raidejumim i rokstu sereju kai portalā lakuga.lv, tai ari žurnalā “A12”.

Pastuosti cytim!

Leave a Reply

Your email address will not be published. Required fields are marked *