Latgaliskais puorguojīņs Rēzeknē
27. julī latgalīšu kulturys kusteiba “Volūda” i naformaluo apvīneiba “Nezināmā Rēzekne” pīduovuoja spēlis “Latgalīšu volūdai draudzeiga vīta – ite Rēzekne!” aktivitati – puorguojīņu, kurā Rēzeknē raudzeja atrast, īraudzeit i atzeimuot vītys, kuruos pasaruoda latgalīšu volūda piļsātvidē voi tuos bejušys zeimeigys latgalīšu kulturai piļsātā i regionā.
Puorguojīņs suocēs pi Rēzeknis Muokslys noma, vede iz Rēzeknis kulturys i atpyutys parku, Rēzeknis Tehnologeju akademeju, pīminiekli “Vienoti Latvijai”, Rēzeknis kulturys nomu, Latgolys kongresa symtgadis pīminiekli, Latgolys īlu, Vacuo tierga laukumu i Rēzeknis Vysusvātuokuos Jezus Sirds Romys katuoļu katedrali. Puorguojīni vadeja “Nezināmā Rēzekne” aktivists Andris Uškāns, bet ar stuostim i atmiņom par vītom pasadaleja ari puorguojīņa dalinīki. Taipat kotrā nūstuošonā vysim beja īspieja pīsadaleit “Volūdys” izdūtuos golda spēlis “Čipierkstneits” vaicuojumu i aizdavumu izaicynuojumūs. Puorguojīņa dalinīki tyka aicynuoti eipaši dagrīzt viereibys latgaliskajim uzrokstim lingistiskajā piļsātys ainovā.
Atguodynuosim, ka juņa vydā kusteiba “Volūda” Rēzeknē atkluoja latgalīšu volūdai draudzeigūs vītu Rēzeknē izzinis spēli “Latgalīšu volūdai draudzeiga vīta – ite Rēzekne!”, kurys mierkis ir dagrīzt viereibys latgaliskajam Rēzeknē – kab tū vaira kasdīnā īrauga vītejī dzeivuotuoji, kai ari izzynoj gosti nu cytu vītu, itys puorguojīņs beja vīna nu spēlis aktivitašu. Vaira par spēli ite: lakuga.lv/ltgdraudzeigs-rezekne
“Latgalīšu volūdai draudzeiga vīta – ite Rēzekne!” spēle i tuos aktivitatis teik reikuotys ar Rēzeknis vaļstspiļsātys pošvaļdeibys agenturys “Rēzeknes Kultūras un tūrisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Fotogalerejā: latgaliskais puorguojīņs Rēzeknē, foto Amanda Anusāne
