Dzejis vokors Jelgovā

9. majā Jelgovys birojs aicynuoja vysus iz dzejisku pasuokumu „Vieja čukstūs īsaklausūt…”. Pasuokums puļcieja desmit vairuok i mozuok zynomus dzejnīkus nu Jelgovys apkaimis i divtik skateituoju.

Vokoru atkluoja vokora vadeituoja Olita Bidzāne i Jelgovys biroja vadeituojs Valērijs Kušnirs ar šmukim īvodvuordim. Turpynuojumā uzastuoja Broņislava Dzene ar sovim sirsneigajim i jaukajim goradorbim. Sovukuort Ingūna Lipska uzastuoja ar muzikalu prīkšnasumu , kas lyka vysim izakustēt i sasiļt. Juoņs Zariņš prīcieja myusus ar dzejis ryndeņom par laimi i mīlesteibu. Elīna Zālīte uzastuoja ar sovim sirsneigajim dzejūlim par tyvenīkim i dzymtū vītu. Juoņs Keičs izaciele ar patriotiskim dzejūlim par Latgolu, snīdze ari humora devu kluotasūšajim. Brigita Kārkliņa skaitieja dzeju par mīlesteibu, attīceibom i dzeivi kūpumā. Juoņs Kjakste skaitieja , kai jis sacieja –  vacus, bet lobus dzejūļus. Lels prīks ari par jaunīšim Edgaru Biksi i Modri Martinovu, kuru dzejis ryndys beja gon par mīlesteibu, gon laimi i šmuku dzeivi.

Bīdreibys jaunīši beja pasaryupejuši par syltu čaju i kopeju, kas lyka sasiļt pasuokuma daleibnīkim.

Vysi dzejnīki ir saisteiti ar Latgolu, jū vysim tei ir dzymtuo vīta. Jī atzyna, ka jīm ir lels prīks par jaunīšim, kurim ryup Latgola i kaidu mozu daleņu nu tuos ir izveidovuši Jelgovā.

Vokora nūbeigumā jaunīši sacieja lelu paļdis dzejnīkim par emocionali boguotu vokoru i kotrs daleibnīks sajieme pateiceibu par pīsadaleišonūs, zīdus, kai ari Valentina Lukaševiča dzejis kruojumu „Vot taidi voti batvini”.

Valērijs Kušnirs

 

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.