Bīdreibys kūpsapuļce 2023

Ituo gods 4. martā 12 stuņdēs aicynojam iz latgalīšu kulturys kusteibys “Volūda” (bīdreibys “LgSC”) kūpsapuļci, kas itūreiz nūtiks kluotīnē Rēzeknē. Taipat tim, kas navar byut kluotīnē, tiks pīduovuota vareiba pīsaslēgt ari attuolynuoti.

Pīsadaleit kūpsapuļcē var kotrys grybātuojs, tik pyrma tuo da 1. marta lyugums aizpiļdeit pīsadaleišonys anketu ite: https://forms.gle/EbN6A4sij6GqCLq56. Preciza informaceja par kūpsapuļcis vītu tiks aizsyuteita e-postā.

Ituo gods kūpsapuļcis plānā ir jaunys vaļdis vieliešonys (beigsīs asūšuos vaļdis diveju godu termeņš), goda puorskota apstyprynuošona, kai ari cyti vaicuojumi, kas skar bīdreibys dorbu da ituo i iz prīšku.

Bolstīseibys kūpsapuļcē ir tim “LgSC” bīdrim, kuri nūkuortuojuši bīdra naudys saisteibys iz kūpsapuļcis šaļti. Par sovu situaceju var izzynuot, rokstūt lgsc@lgsc.lv.

Pyrma kūpsapuļcis catūrtdiņ, 2. martā, 18.00 nūtiks kasmieneša vaļdis sēde (attuolynuoti), kurā ari var pīsadaleit kotrys interesents, tik pyrma tuo juodasasoka saitis dabuošonai.

Piec kūpsapuļcis 4. martā 18.00 bīdreibys bīdri kūpā aicynuoti īt iz Latgalīšu kulturys goda bolvys “Boņuks 2022” ceremoneju Latgolys viestnīceibā GORS. Bolvai nomināti ari vairuoki bīdreibys dorbi – bīdreibys darbeiba 2022. godā kai taida, bīdreibys izdūtuo Vinsenta Flikigera i Edeitis Husaris gruomota “Trusīni vessim reitā pi puiša”, kai ari kūpā ar Nautrānu pogosta kulturys nomu eistynuotais pyrmais latgalīšu dzejis slams “Rogovkys dzejis voga”.