Ar bīdreibys strategejis aprīdi nūsaslādz “LgSC” bīdru apvuiceibu i komandys styprynuošonys programa
Sastdiņ i svātdiņ, 16. i 17. julī, Rēzeknis nūvoda lauku sātā “Bondari” bīdreiba “LgSC” sovus bīdrus, draugus i cytus interesentus aicynuoja kūpā pavadeit nasteidzeigu nedeļgolu, kura nūslāgumā beja īcarāta bīdru apvuiceibu i komandys styprynuošonys programys nūslāgums ar bīdreibys strategejis jaunam periodam apsprīsšonu.
Lauku sātys “Bondari” saimineica ir “LgSC” bīdre Regita Zeiļa i, atguodojūt sovulaik Viļānūs nūtykušuos “Tievanānu pavasara” sasatikšonys ar kūpeigu tolku, literaturu i muzyku, jei aicynuoja “LgSC” bīdrus, draugus i interesentus sasatikt vīnā nasteidzeigā nedeļgolā “Bondarūs”, kab kūpā pastruoduotu, pošu sataiseituos miestardarbneicuos īsavuiceitu koč kū jaunu, sasatiktu i ari dūmuotu par bīdreibys strategeju jaunam dorba periodam.
Nasteidzeigais nedeļgols “Bondarūs” reizē saguoja ari Aktivūs īdzeivuotuoju fonda atbaļsteituo projekta bīdreibys “LgSC” kapacitatis styprynuošonai bīdru apvuiceibu i komandys styprynuošonys programys nūslāguma sasatikšona. Da ituo, jemūt vārā pandemejis apstuokļus, kluotīnē vareiba sasatikt beja programys atkluošonys reizē 2021. gods majā, tuoļuok sekuoja treis nakluotīnis sasatikšonys, nu i tod ari nūslāguma sasatikšonu ar programys rezultatu izviertiešonu tyka izlamts reikuot kluotīnē. Nūslāguma sasatikšonā i sarunuos par strategeju kluotyn beja ari apvuiceibu i komandys styprynuošonys programys treneri Ieva Johansson i Henric Johansson nu izaugsmis platformys “MeYou.One”.
Sasatikšonā “Bondarūs” bīdreibys vadeituoja Edeite Husare prezentēja bīdreibys jauna dorba perioda strategiskū vierzīni, kas izakristaliziejs taišni bīdreibys bīdru sasatikšonuos projekta laikā, dūmojūt, runojūt i sprīžūt par bīdreibys vierteibom, dorbim, mierkim i sapynim, kai ari tū, kas “LgSC” bīdrim ir svareigi kai sovā vydā, tai ari dorūt sabīdreibai i plašuokam mārūgam. Itei sasatikšona beja vareiba vēļ vaira precizēt tū, kas ir sacynuots, papyldynuot strategeju i dalikt vēļ kaidys idejis.
Apvuiceibu i komandys styprynuošonys programys nūslāgumā izaugsmis platformys “MeYou.One” trenere Ieva Johansson atzyna, ka jai beja prīca byut kluotyn bīdreibys styprynuošonys procesā, paleidzēt bīdreibai augt, bīdrim īsaklauseit vīnam ūtrā i meklēt vēļ vaira īspieju sasadorbuot kūpeigūs mierku sasnēgšonai. Taipat Ieva saceja, ka poša meilupruot īsastuotu bīdreibā, jo radz, cik dedzeigi, aizrauteigi i ar kaidu entuziasmu teik dareitys lītys latgaliskuos kulturys laukā.
Projektā eistynuotūs apvuiceibu, komandys styprynuošonys kai ari bīdru individualūs koučinga seseju kai 2021. gods, tai 2022. gods vosorā mierkis beja styprynuot bīdreibys “LgSC” kapacitati, apjaust komandys spāku i atguodynuot pošim sev, deļkuo koč kas teik dareits i kū ar tū gribīs dabuot gotovu. Bīdreibys bīdri atzeist, ka prīca bejuse koč voi nu regularu sasatikšonu, jo pyrma tuo īrosts, ka dūmuošonā par bīdreibys vierzeibu iz prīšku pamatā bejuse vaira kasgadejā kūpsapuļcē, kai ari jo eipaši prīcynuojuse apziņa, ka tys, deļkuo kotrys ir īsastuojs bīdreibā, nav mainejīs – pateik byut kūpā i dorbuotīs latgalīšu lītu vierzeibā.
Bīdreibys “LgSC” nasteidzeiguo nedeļgola sasatikšona “Bondarūs”, daleibnīku foto
________
Bīdreibys apvuiceibu i komandys styprynuošona, kai ari bīdreibys strategejis atjaunuošona ir projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitatis. Projekts teik eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.
