Apvīneiba “Atzolīši” kūpā ar reperi Ūgu īrakstejuši dzīsmi “Zalts sudobra vītā”
Augusta vydā bīdreiba “LgSC” Bolvu nūvoda Rekovys vydsškolā reikuoja latgalīšu seminaru jaunīšim “Atzolys”, kurā pīsadaleja 18 jaunīši, kab vuiceitūs latgalīšu rokstu volūdu, izzynuotu regiona kulturviesturi, kai ari saprastu īspiejis, kai byut aktivim latgaliskajā kulturvidē. Vīna nu nūdarbeibu jaunīšim beja ar reperi Ūgu, kuruos rezultats niu daīmams publiski – dzīsme “Zalts sudobra vītā”.
Apvīneiba “Atzolīši” ir latgaliskuo jaunīšu seminara “Atzolys 2022” dalinīki, kuri vīnys dīnys laikā nūdarbeibuos ar reperi Ūgu radeja sovu dzīsmi, stuostūt par lītom, kuruos jim pateik, par kū jī sepinej, par jaunīšu sajiutom myusu dīnuos i dūmojūt, ka dzīsme varātu tikt ka na par vysu Latgolys jaunīšu, tod vysmoz par “Atzolu” himnu gon. Dzīsmis bīta autors ir Māris Keišs nu “Bigmaar’s Records” īrokstu studejis Upītē, kur nūtyka ari pats “Zalts sudobra vītā” īroksts.
Seminara vadeituoja, bīdreibys “LgSC” kulturys aktivitašu organizatore Amanda Anusāne soka: “Pādejuos desmitgadēs veids, kai jaunīši vysu aktivuok i spylgtuok īsasaistejuši latgalīšu kulturā, ir taišni car muzyku, deļtuo gribiejom, kab seminara dalinīkim ir vareiba paraudzeit ari koč kū nu ituos sferys. Nūdarbeibuos ar Ūgu jaunīši varēja saprast, ka raksteit dzīšmu vuordus nav nimoz cik vīgli – kai īlikt ideju, pasceit tū, kū gribi, i vēļ pīdūmuot, kab tekstā byutu vīta kaidim senejuokim latgalīšu vuordim.”
Latgaliskajā seminarā “Atzolys” pīsadaleja 18 jaunīši nu dažaidu Latgolys vītu, kai ari vīna dalineica beja nu Reigys. Četruos seminara dīnuos jaunīši pīsadaleja dažaiduos nūdarbeibuos – vuicejuos raksteit latgaliski, sasatyka ar latgaliskajā kulturā aktivim muokslinīkim i īdvesmuotuojim kai Ūga i Lauris Zalāns, izzynuoja vaira par breivpruoteigū dorbu, socialū uzjiemiejdarbeibu, medejprateibu, Latgolys kulturā nūzeimeigū personeibu Mikeli Bukšu, rakstnīceibu, uzjiemiejdarbeibu laukūs, Upītis kulturtelpu, kai ari latgalīšu navaļstiskajom organizacejom. Taipat “Atzolu” laikā jaunīši radeja kūpeigu dzīsmi “Bigmaar’s Records” īrokstu studejā, pīsadaleja radejis raidejuma “Pīci breinumi” tapšonā i cytuos aktivitatēs. Ar jaunīšim seminarā struoduoja latgalīšu rokstu volūdys specialiste Māra Mortuzāne-Muravska, Socialuos uzjiemiejdarbeibys asociacejis vadeituoja Regita Zeiļa, Bolvu Centraluos bibliotekys vadeituoja Ruta Cibule, kai ari komandu sasalīdiešonys aktivitatis vadeja Ieva Johansson nu platformys “MeYou.One”, par piļsūniskū leidzdaleibu runuoja Guntis Rasims, par sovu pīredzi kai rakstnīkam stuosteja romana “Bruoli” autors Aldis Bukšs, bet ar latgalīšu navaļstiskajom organizacejom i jaunīšu vareibu tamuos īsasaisteit īpazeistynuoja Edeite Husare.
Piec seminara vīns nu tūs dalinīku, Dāvids Rubens, saceja: “Eisā laikā organizātuojim izadeve paruodeit, cik boguota i dažaida ir latgaliskuo kulturtelpa i sabīdryskuo darbeiba, tai vadynuot ari kotru nu myusu rast tū eistū vītu, kurā likt sovu davumu. Muzyka, literatura, medeji, politika, komercdarbeiba i tai tuoļuok. Nav juosteidz latgaliskū atdaleit atseviški, bet taišni preteji – tys ir juointegrej kotrā jūmā i lauceņā, saprūtūt, ka latgaliskuos atškireibys ir pīvīnuotuo vierteiba pošys par sevi.”
Pyrmū reizi seminars “Atzolys” nūtyka 2004. godā i tai sešus godus piec kuortys da 2009. goda, piečuok ar puortraukumim 2014. i 2016. godā. Kab aktivi īsasaisteitu latgalīšu kulturys procesūs, seminars sovulaik bejs kai atspierīņa punkts ari daudzim itūšaļt latgaliskajā kulturtelpā zynomajim aktivistim. Seminara “Atzolys” mierkis ir veicynuot jaunīši aktivu īsasaisteišonu demokratejis i piļsūnyskuos sabīdreibys veiduošonā, jūs izgleitojūt vaicuojumūs, kurī saisteiti ar socialekonomiskajim faktorim i Latgolys regiona vierteibom, jo eipaši latgalīšu rokstu volūdu.
Seminara nūtikšonu finansiali atbaļsteja Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, kai ari Latgolys kulturys programa, kurū eistynoj Vaļsts kulturkapitala fonds i Latgolys regiona atteisteibys agentura ar AS “Latvijas valsts meži” atbolstu. Sirsneigs paļdis par atbolstu i seminara dalinīku prīcynuošonu ari Bolvu nūvoda pošvaļdeibai, SIA “Rēzeknes gaļas kombināts” i IK “Healthy Snacks” par styprynūšajim GRIKSi batonenim, kai ari Rekovys vydsškolys i Rekovys kulturys centra kolektivim par atsauceibu i sātu iz seminara laiku.
Pieci.lv raidejums “Pīci breinumi”: https://pieci.lv/lv/lr5/raksts/pici-breinumi/5breinumi-cik-daudz-es-varu-ietekmet.a164782/