Aplikaceju WhatsApp i Telegram uzleimis latgalīšu volūdā
Mobilūs telefonu aplikaceju “WhatsApp” i “Telegram” lītuotuojim ir vareiba palikt latgaliskuokim, kasdīnys saziņā ar draugim, rodim i kolegom izmontojūt speciali izveiduotuos uzleimis (stickers) latgalīšu volūdā. Tuos radejs “Latgalīšu kulturys ziņu portals lakuga.lv” ar ASV dzeivojūšuo latgalīša, filantropa Pītera Aloiza Ragauša finansialu atbolstu.
Speciali izveiduotuos uzleimis aplikacejom “WhatsApp” i “Telegram” ītver kasdīnā i ari eipašuokuos dzeivis šaļteņuos lītuotys frazis latgalīšu volūdā, kai pīmāram, “Vasals!”, “Daudz laimis dzimšonys dīnā!”, “Es tevi mīļoju”, “Laimeigu Jaunū godu!”, “Nui!”, “Šmuki!”, “Lobs reits!” i c. Kūpumā radeitys 22 uzleimis ar latgaliskim tekstim. Aplikaceja “Latgalian stickers”/ “Latgalīšu uzleimis” papyldynuota ar četrim Latvejā lītuotim karūgim – Latvejis, Latgolys, līvu i Sielejis karūgu.
Uzleimu izveidē latgalīšu portals lakuga.lv sasadorbuoja ar dizaineri Inesi Krivmani i programātuoju Juoni Rancānu. Tūs izveidi finansiali atbaļsteja ASV dzeivojūšais latgalīts, uzjiemiejs i Latvejis gūda konsuls Teksasys štatā Pīters Aloizs Ragaušs.
“Mes gribējom latgalīšu volūdu paruodeit atraktivā i modernā veidā, jo eipaši uzrunuot jaunīšus. Latgalīšu volūda digitalajuos tehnologejuos veicynoj juos lītuošonu. Taidys lītuotnis kai “WhatsApp” i “Telegram” paleidz dažaiduos pasauļa vītuos dzeivojūšajim latgalīšim uzturēt kontaktus. Munupruot, tys ir breineigi, ka itū saziņu vēļ interesantuoku padora uzleimis latgalīšu volūdā,”soka P. Aloizs Ragaušs.
Kab uzleimis īgiutu lītuošonai “Telegram”, juoatver saite https://t.me/addstickers/LatgalianStickers i juosekoj tuoļuok nūruodeitajom darbeibom. Latgalīšu uzleimis “Telegram” bezmoksys ir daeinamys gon Android, gon Apple iOS operātuojsistemu mobilūs īreiču lītuotuojim.
Android telefonu lītuotuoji aplikaceju “Latgalian stickers”/ “Latgalīšu uzleimis” izmantuošonai “WhatsApp” var īgiut https://play.google.com/store/apps/details?id=com.ltg.stickers.
Niu nūteik dorbs pi uzleimu izveidis Apple iOS operātuojsistemys lītuotuojim, cikom iPhone lītuotuoji “WhatsApp” sajimtuos latgalīšu uzleimis nu Android sistemu lītuotuoju var saglobuot kai “Favorīti/Favourite” (juoizspīž iz uzleimis i juosekoj tuoļuok nūruodeitojim darbeibom) i izmontuot syuteišonai.
“Latgalīšu kulturys ziņu portals lakuga.lv” ir pasaulē vīneigais tikai latgalīšu rokstu volūdā saturu rodūšs medejs. Tymā var skaiteit par Latgolys i latgaliskuos kulturys aktualitatem, intervejis ar sabīdreibā zynomim cylvākim, kai ari atrast vierteigus materialus latgalīšu volūdys raksteitprasmis uzlobuošonai. Portalu lakuga.lv uztur bīdreiba “Latgolys Studentu centrs”, bīdreibys dorbu 2020. godā atbolsta Vaļsts kulturkapitala fonds profesionalu navaļdeibys kulturys organizaceju atbolsta programys ītvorūs.