Aicynojam iz latgaliskū grafiti darbneicu ar Valteru Murānu
Sastdiņ, 19. augustā, 12.00 stuņdēs vysu vacumu riezeknīši, eipaši jaunīši, kūpā ar latgalīšu alternativuos kulturys personeibu, “Ausmeņa Records” aktivistu i “Ausmeņa Kebabs” saiminīku Valteru Murānu aicynuoti īsasaisteit kūpeiga grafiti #latgaliski tapšonā iz Rēzeknis Sporta puorvaļdis stadiona sātmaļa (Raiņa īlā).
Grafiti darbneica latgaliskuokai Rēzeknei ar Valteru Murānu nūtiks sastdiņ, 19. augustā, 12.00 stuņdēs pi Rēzeknis Sporta puorvaļdis stationa sātmaļa (Raiņa īlā). Pīsadaleišona pasuokumā ir bezmoksys i kotrys grybātuojs varēs paraudzeit sovus spākus grafiti zeimuošonā latgalīšu alternativuos kulturys personeibys Valtera Murāna vadeibā, viertīs, kai grafiti zeimoj pat Valters, kurs ir pīredziejs grafiti muokslinīks, kai ari paraleli aizdūt vaicuojums par “Ausmeņa Records” dorbuošonūs.
Nūtikšona ir vīna nu spēlis “Latgalīšu volūdai draudzeiga vīta – ite Rēzekne!” aktivitašu. Interaktivuo spēle 5 km garā i 1,5 h stuņžu ilgā maršrutā izvad caur 13 latgalīšu volūdai draudzeigom vītom piļsātā. Spēlis mierkis ir dagrīzt vierteibu latgaliskajam Rēzeknis piļsātvidē. Spēlē var pīsadaleit interesenti nu sevkurys Latvejis (i cytys pasauļa) vītys.
Vaira par spēli ITE. Pīsadaleit spēlē aplikacejā “Actionbound” var ITE.
Pasuokumā tiks filmāts i fotografāts. Dabuotī vizualī materiali tiks izmontuoti spēlis publicitatis taiseišonai.
Spēle i cytys “Latgalīšu volūdai draudzeiga vīta – ite Rēzekne!” aktivitatis teik taiseitys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.