Rēzeknē par vīnu latgalisku vītu niu vaira
Sastdiņ, 19. augustā, latgalīšu kulturys kusteiba “Volūda” kūpā ar latgalīšu alternativuos kulturys personeibu, “Ausmeņa Records” aktivistu i “Ausmeņa Kebabs” saiminīku Valteru Murānu aicynuoja lelus i mozus rēzeknīšus i piļsātys gostus īsasaisteit kūpeiga grafiti #latgaliski tapšonā. Kūpeigā dorbā niu Rēzeknē ir par vīnu latgalisku vītu vaira.
Grafiti darbneicā latgaliskuokai Rēzeknei kūpā ar Valteru Murānu iz Rēzeknis Sporta puorvaļdis stadiona sātmaņa (Raiņa īlā) grafiti tehnikā izzeimuoja seikšaļtenis atzeimi #latgaliski i vēļ vairuokys kasdīnā labi zynomys frazis latgaliski – “Vasals!”, “Loba dīna!”, “Lobu nakti!”, “Paļdis!” i cytys. Darbneicā varēja īsasaisteit kai lelī tai mozī interesenti, kuri gribēja paraudzeit sovus spākus grafiti tapšonā – īsavuiceit kruosys pyusšonu, izzynuot, kū nūzeimoj konturiešona, kaida ir grafiti zeimuošonys seceiba nu sīnys gruntiešonys, zeimiejuma skicis da pīlobuošonai. Paraleli praktiskai rūseibai Valters atbiļdieja ari iz interesentu vaicuojumim par juo poša pīredzi grafiti muokslā.
Darbneicā, kura saguoja ap treis stuņžu gara, pīsadaleja i taidi interesenti, kurī iz nūtikšonu brauce speciali (eipaši lels paļdis i sveicīni Kuzminsku saimei par pīsadaleišonu nu pyrmuos linejis da pādejuos konturys!), tai ari garum guojieji, kuri ar prīcu izruodeja interesi i dalyka sovu rūku, kab dorbs dreižuok ītu iz prīšku. Kūpā vysā darbneicys nūtikšonys laikā kluotyn beja i sovu rūku dalyka ap 20 interesentu vysaidūs vacumūs.
Grafiti zeimiejuma idejis pamata zeimiejuma seikšaļtenis #latgaliski atzeimi Valters izdūmuoja kūpā ar “Volūdys” aktivistim, bet apleik zeimātuos frazis, kuru vizualizacejis nūsavārtys nu latgalīšu kulturys ziņu portala lakuga.lv WhatsApp uzleimu, beja darbneicys dalinīku īsacejumi. Kai atzeimuoja “Volūdys” aktiviste Kristīne, tod meila šaļts beja, kod kaids mozais zeimātuojs, kurs atguoja iz nūtikšonu kūpā ar mamu, saprats, ka ite vysi teksti ir latgaliski, pašveikstēja mamai, ka lobpruot pīraksteitu sveicīni “Vasals!”, kū tod ar Valtera tolkā īšonu jis ari padareja.
Darbneicā kluotyn beja ari “Volūdys” jaunīšu izaugsmis i Latgolyss izzynuošonys programys “LTG tu dū!” dalineicys Agnese i Marija, kurys, kai tūpūšuos muokslineicys, pīsadaleit pamudynuojuse interese par tū, kai tūp grafiti muokslysdorbi – da ituo nav zynuojušys.
Sazeimuotais latgaliskais grafiti niu apsaverams iz stadiona sātmaļa, bet vysi interesenti vēļ arviņ aicynuoti pīsadaleit spēlē “Latgalīšu volūdai draudzeiga vīta – ite Rēzekne!”. Darbneica ari beja vīna nu tuos aktivitašu. Interaktivuo spēle 5 km garā i 1,5 h stuņžu ilgā maršrutā izvad caur 13 latgalīšu volūdai draudzeigom vītom piļsātā. Spēlis mierkis ir dagrīzt vierteibu latgaliskajam Rēzeknis piļsātvidē. Spēlē var pīsadaleit interesenti nu sevkurys Latvejis (i cytys pasauļa) vītys. Vaira par spēli ITE. Pīsadaleit spēlē aplikacejā “Actionbound” var ITE.
Niu, turpynojūt spēlis aktivitatis, latgalīšu kulturys kusteiba “Volūda” 26. septembrī (Eiropys Volūdu dīnā) aicynuos iz latgalīšu rokstu volūdys i rodūšuos plakatu raksteišonys darbneicu Rēzeknis Centralajā bibliotekā.
Fotogalerejā: grafiti darbneica Rēzeknē, foto Amanda Anusāne, Edeite Laime i Ainārs Olūtnieks
Spēle i cytys “Latgalīšu volūdai draudzeiga vīta – ite Rēzekne!” aktivitatis teik taiseitys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.