Sešu mienešu latgaliskuos nūtikšonys īmyužynuotys kulturys ziņuos
Turpynojūt dūmuot par latgaliskuos kulturys ziņom dažaiduokūs i auditorejai interesantuokūs formatūs, bīdreibys “LgSC” uzturātais Latgalīšu kulturys ziņu portals lakuga.lv pyrmū reizi itūgod pīduovuoja nūsavērt lagaliskuos kulturys viests video formatā – tymuos eisi tyka stuosteits par latgaliskuos kulturys nūtikšonam īprīškejā mienesī.
Itūgod veiksmeigi eistynojīs portala lakuga.lv ir plans itaida formata viests gataveit reizi mienesī – kūpā sataiseitys seši ziņu raidejumi par latgaliskuos kulturys nūtikšonom 2021. gods majā, junī, julī, augustā, septembrī i oktobrī. Ziņu satura redaktore, portala lakuga.lv atteisteibys vadeituoja Edeite Husare, aizsuocūt projektu, saceja: “Apsazynojūt, ka pi izvēlis skaiteit viests latvīšu literarajā volūdā voi latgaliski, vys tei gribiešona nav latgalīšu rokstu volūdys vierzīnī, bet video formats i eisa hronometraža ir veids, kai par latgaliskuos kulturys nūtikšonam varim izstuosteit plotuokai auditorejai, nūturūt tuos uzmaneibu.”
Kulturys ziņu eistynuošona ir projekta “Latgaliskā kultūrtelpa: problēmas, analīze, atspoguļojums portālā lakuga.lv” daļa, tū finaņsej Medeju atbolsta fonds nu Latvejis vaļsts budžeta leidzekļu. Par raidejuma saturu atbiļdēja latgalīšu kulturys ziņu portals lakuga.lv. Cikom sataiseiti vysi īcarātī seši ziņu raidejumi, bet tiks maklātys īspiejis, kab itaida formata viests varātu turpynuot ari iz prīšku.
Portala lakuga.lv komanda soka paļdis par atsauceibu i atbolstu ziņu sataiseišonā raidejuma vadeituojam Dāvim Suharevskim, video operatoram i montažys režisoram Sergejam Čakānam, grafiku veiduotuojam Krišjānim Pleiko (Upes kinostudija), kai ari Krasta studejai Rēzeknē.
