Pīktajā diktatā latgalīšu rokstu volūdā pīgrīzs viereibys raksteitprasmei latgaliski

Pīktajā diktatā latgalīšu rokstu volūdā pīgrīzs viereibys raksteitprasmei latgaliski

Sastdiņ, 27. novembrī, pīgrīžūt viereibys sabīdreibys raksteit prasšonai latgalīšu rokstu volūdā, nūtiks jau Pīktais pasauļa diktats latgalīšu rokstu volūdā. Tys skanēs sastdīnis vokora raidejumā “Kolnasāta” (dzierdams Latvejis Radejis 1. programys eterā 18.15), kai ari video formatā byus daīmams Sabīdriskūs medeju portalā lsm.lv, latgalīšu kulturys ziņu portalā lakuga.lv i socialajūs teiklūs. Diktatu organizej bīdreiba “LgSC”, Latgalīšu kulturys ziņu portals lakuga.lv i Latvejis Radejis Latgolys studeja. Itūgod diktatā aktrise Inga Misāne-Grasberga skaiteis fragmentu nu Ilzis Spergys vēļ napublicātuo stuosta “Seiki kūceni zīdēja”.

Novembra pādejuo sastdīne itūgod ir dīna, kod nūteik ari Pasauļa diktats latvīšu volūdā, bet, kab aktualizātu ari latvīšu volūdys viesturiskuo paveida – latgalīšu rokstu volūdys – lītuojumu i pīvārstu sabīdreibys viereibys raksteit prasšonai latgaliski, jau pīktū reizi tamā pošā dīnā nūteik ari diktats latgalīšu rokstu volūdā. Ideja par itaida diktata nūtikšonu roduos 2017. godā tuo laika portala lakuga.lv redaktorei Vinetai Vilcānei. Nu ituo gods septembra pyrmū reizi mierktīceigi latgalīšu rokstu volūda kai pilotprojekts teik vuiceita septeņpadsmit Latgolys školuos. Pyrma tuo latgalīšu rokstu volūdu školuos beja vareiba īsavuiceit atseviškuos fakultativajuos stuņdēs, bet pīaugušajim viņ kaidūs dažaidu organizaceju reikuotūs naregularūs kursūs voi seminarūs.

Portala lakuga.lv vadeituoja Edeite Husare soka: “Jamūt vārā tū, ka vīnuotys latgalīšu rokstu volūdys normys ir jau nu 20. godu symta suokuma, i viertejūt tū, kū redzim publiskajā vidē, sabīdreibys raksteitprasme latgaliski ir saleidzynūši zamā leiminī. Skaidrojums atrūnoms tymā, ka školuos latgalīšu rokstu volūda da ituo gods nav vuiceita jau vaira nakai 80 godu – leluokā daļā kotram interesentam volūda juosavuica pošvuiceibys ceļā. Deļtuo ari portalā regulari raugam izgleituot i stuosteit par latgalīšu rokstu volūdys vaicuojumim. Leidza ar diktatu gribim aicynuot pīvērst uzmaneibu tam, ka ari latgalīšu rokstu volūdai ir sovys normys i raksteibys nūsacejumi.”

Pīktais pasauļa diktats latgalīšu rokstu volūdā skanēs sastdīnis, 27. novembra, vokorā 18.15 raidejumā “Kolnasāta” Latvejis Radejis 1 eterā, kai ari video formatā byus nūsaverams Sabīdryskūs medeju portalā lsm.lv, latgalīšu kulturys ziņu portalā lakuga.lv, taipat i Latvejis Radejis Latgolys studejis i portala lakuga.lv socialajūs teiklūs. Diktata teksts, kū skaiteis aktrise Inga Misāne-Grasberga, piec diktata nūslāguma puorbaudei byus daīmams lakuga.lv i lsm.lv. Piečuok portalā lakuga.lv byus vareiba puorskaiteit vysu da ituo napublicātū Ilzis Spergys stuostu “Seiki kūceni zīdēja”, kuruo fragments ir ituos reizis diktata teksts. Diktata teksts sagataveits, īvārojūt 2007. godā apstyprynuotūs Latgalīšu raksteibys nūsacejumus.

Kab popularizātu raksteišonu latgaliski, nu 23. da 27. novembra diktata organizātuoji ari aicynoj socialajūs medejūs publicēt biļdis voi video, dalīkūt temturus #rokstulatgaliski i #latgaliski, ar koč kur publiskajā vidē radzamim uzrokstim latgaliski, tam, kai poši roksta latgaliski kasdīnā, voi tū, kai teik raksteits diktats latgaliski. Interesantuokuos publikacejis autors sajims puorsteiguma bolvu.

Ituogods diktats simboliski byus kai prīškviestness dreižumā gaidomajim pyrmajim radejis lasejumim latgaliski, kurūs nu 7. da 11. decembra Latvejis Radejis eterā skanēs seši Ilzis Spergys stuostu kruojuma “Dzeiveiba” stuosti. Radejis lasejumu eistynuošona ir ari Latvejis Radejis Latgolys studejis i bīdreibys “LgSC” sadarbeibys projekts.

Medeju “Latgalīšu kulturys ziņu portals lakuga.lv” uztur i darbeibu nūdrūsynoj bīdreiba “LgSC”, kura jau vaira nakai 15 godu eistynoj dažaidus ar latgalīšu volūdys saglobuošonu, atteisteišonu i populariziešonu saisteitus projektus. Portals lakuga.lv sovu darbeibu izsuoce 2007. godā, tys vys vēļ ir vīneigais medejs pasaulī, kura saturs teik sagataveits tikai latgalīšu rokstu volūdā.

Latgaliskais raidejums “Kolnasāta” jau nu 2012. gods kotru sastdīni izskaņ Latvejis Radejis 1. programā. Raidejumu veidoj Latvejis Radejis Latgolys studeja i tymā dzierdamys kai sarunys i intervejis, tai izgleitojūšys rubrikys par latgalīšu volūdu, Latgolys kulturys procesim i nūtikšonom.

Pastuosti cytim!

Leave a Reply

Your email address will not be published. Required fields are marked *