Izskanēs pyrmī radejis lasejumi latgaliski – Ilzis Spergys kruojuma “Dzeiveiba” stuosti

Izskanēs pyrmī radejis lasejumi latgaliski – Ilzis Spergys kruojuma “Dzeiveiba” stuosti

Nu 7. da 11. decembra kotru vokoru 22.05 Latvejis Radejis 1 eterā izskanēs pyrmī radejis lasejumi latgaliski – Ilzis Spergys kruojuma “Dzeiveiba” stuosti. Radejis lasejumu muokslinīcyskais vadeituojs ir Kristaps Rasims, bet stuostu klausamuos versejis golvonais bolss – Latvejis Nacionaluo teatra aktrise Inga Misāne-Grasberga.

Ilzis Spergys debeja stuostu kruojumā “Dzeiveiba”, kas izguojs 2014. godā, apkūpuoti deveni da tuo napublicāti voi škārsteiklā fragmentari publicāti stuosti latgaliski. Radejis lasejumu versejā byus īmyužynuoti seši nu tūs – 7. decembrī skanēs stuosts “Marabeju kolns”, 8. decembrī “Puika mežā”, 9. decembrī “Laime”, 10. decembrī “Duraceņš” i “Stuosts par suneiti”, bet 11. decembrī radejis lasejumi nūsaslēgs ar stuostu “Deputats”. Kotru vokoru gaidoms gondreiž stuņdi gars īroksts. Taipat vysi stuosti jau 7. decembrī byus daīmami nūsaklauseišonai Latvejis Radejis sātyslopā i latgalīšu kulturys ziņu portalā lakuga.lv. “Dzeiveiba” radejis lasejumi byus pyrmais da ituo audio versejā piļneibā latgaliski īraksteitais i Latvejis Radejis “Radioteatrī” izskaniejušais dorbs.  

Stuostu kruojums “Dzeiveiba” sovulaik sajēme Latgalīšu kulturys goda bolvu “Boņuks” kai lobuokais snāgums literaturā 2014. godā, kai ari Ilze Sperga par “Dzeiveiba” tyka nomināta Latvejis literaturys goda bolvys “LaLiGaBa” kategorejā “Goda debeja”. Stuostu kruojuma redaktore Anna Rancāne par tū sovulaik sacejuse: “Ilzis Spergys stuostūs dzeivoj mozī ļauds. Tī, par kurim Svātajūs Rokstūs saceits, ka taišni jim Dīvs atkluojs dabasu vaļsteibys nūslāpumus. I bāda asūt viņ tim, kurī nūdareis puori koč vīnam nu tūs mozūs. Šaļtim skaitūt izīt smogums nu cik skaudra dzeivis materiala, bet gruomotys nūsaukums ir “Dzeiveiba”, i tys līcynoj, ka vyss gols golā vys tik pasavierš iz gaišū pusi. Itī ir stypruos Latgolys styprī stuosti.”

Aktrise Inga Misāne-Grasberga, kurei ir “Dzeiveiba” radejis lasejumu golvonais bolss, par dorbu pi stuostu audio versejis soka: “Tys maņ beja kai lels pagūdynuojums, tai reizē ari puordzeivuojums, voi tū vyspuor variešu izdareit, jo da ituo ar latgalīšu literaturys tekstim nabeju sasaskuoruse. Stuostu kruojuma “Dzeiveiba” nūsaukums tik precizi atbiļst tam, kas ir stuostūs – dzeiveiba vysā: darbeibuos, dobā, attīceibuos i ari dzeivinīkūs. Šaļtim maņ beja komuļs koklā aiz tuo, cik dzili suopeigi, nu reizē ari vīgli Ilze ar vuordim izsacejuse sajiutys.” Sūpluok Ingai “Dzeiveiba” radejis lasejumūs īsaskaņ ari cytu leluoku i mozuoku īrunuotuoju bolsi, jo eipaši nu Kuorsovys i Preiļu pusis. Taipat stuostu audio verseju papyldynoj īroksta muokslinīcyskuo vadeituoja Kristapa Rasima radeituo muzyka.

Stuostu kruojuma “Dzeiveiba” radejis lasejumi topuši ar Vaļsts kulturkapitala fonda programys “KultūrELPA” i Latvejis Radejis finansialu atbolstu. Radejis lasejumu īroksta projektu eistynoj bīdreiba “LgSC”, sasadorbojūt ar Latvejis Radejis Latgolys studeju. “LgSC” i LR Latgolys studeja tur nūceju, ka iz prīšku radejis lasejumu formatā izskaniešonai Latvejis Radejis Radioteatrī reizi godā varātu sagataveit vysmoz vīnu latgalīšu literaturys dorbu.

Ite var nūsaklauseit raidejumā “Kolnasāta” izskaniejušū sarunu par “Dzeiveiba” radejis lasejumim ar Ingu Misāni-Grasbergu, Kristapu Rasimu i Ilzi Spergu:

Pastuosti cytim!

Leave a Reply

Your email address will not be published. Required fields are marked *