LgSC aktivitatis 2020. godā atbolsta VKKF
Roksta autors: Vineta Vilcāne
Bīdreibys “Latgolys Studentu centrs” latgaliskuos aktivitatis 2020. godā atbaļsteis Vaļsts kulturkapitala fonds profesionalu navaļdeibys kulturys organizaceju atbolsta programa. Sajimtais finansiejums LgSC paleidzēs eistynuot vairuokus pasuokumus.
LgSC dorbojās nu 2005. goda i ir vīna nu vacuokūs i aktivuokūs latgalīšu navaļstiskū organizaceju, kura ar sovu darbeibu daudzu godu garumā ir veicynuojuse Latgolys regiona kulturviesturiskuo montuojuma saglobuošonu i jaunu kulturys vierteibu radeišonu i populariziešonu. Itūs godu laikā LgSC ir izdevs 14 gruomotu, organiziejs latgalīšu rokstu volūdys kursus, latgalīšu volūdys i kulturys seminarus, breivuo laika pavadeišonys vokorus i izklaidis pasuokumus jaunīšim, izveiduojs i uzturiejs portalu lakuga.lv i c.
Projektā tiks eistynuots vaira nakai 15 aktivitašu – akceja “Latgalīšu volūdai draudzeiga vīta”, padūta Žyka bolva Latgalīšu kulturys goda bolvys “Boņuks 2019” ceremonejā, Facebook.com uzturāta lopa “Exploring the Latgalian World”, kuruo angļu volūdā viestej par latgalīšu volūdu i latgaliskū kulturu, nūdrūsynuota portala lakuga.lv darbeiba, organizāta storptautyska vosorys škola, kas veļteita regionalūs volūdu tematikai, 2020. gods rudinī tiks reikuots caturtais pasauļa diktats latgalīšu volūdā i c.
