Īsuoc akceju “Latgalīšu volūdai draudzeiga vīta”
Storptautiskajā Dzymtuos volūdys dīnā, 21. februarī, latgalīšu portals lakuga.lv īsuoc akceju “Latgalīšu volūdai draudzeiga vīta”, aicynojūt sajimt eipaša dizaina uzleimi. Akcejis mierkis ir mudynuot latgalīšus kasdīnys saziņā izmontuot dzymtū volūdu, kai ari veicynuot sabīdreibys izpratni par latgalīšu volūdys vierteibu i pozitivu attīksmi pret jū.
“Latgalīšu kulturys ziņu portals lakuga.lv” radejs eipaša dizaina uzleimi “Latgalīšu volūdai draudzeiga vīta”, pīduovojūt jū bez moksys sajimt uzjāmumim, organizacejom, vaļsts i pošvaļddeibu īstuodem, kuruos teik lītuota latgalīšu volūda i kuru klientim, pakolpuojumu sajiemiejim ir vareiba sasazynuot latgaliski, kai ari vītom, kuramuos pīīmami resursi latgaliski. Uzleimis dizainu veiduojuse Inese Krivmane.
“Ar itū akceju mes gribim mudynuot latgalīšus kasdīnys saziņā vaira izmontuot sovu dzymtū volūdu, kai ari vīnlaikus veicynuot sabīdreibys izpratni par latgalīšu volūdys vierteibu i pozitivu attīksmi pret jū. Kasdīnys saziņā latgalīšu volūdu izmontoj 8–9% Latvejis īdzeivuotuoju, i volūdai ir cīši lela nūzeime latgaliski latvyskuos identitatis saglobuošonā ,” soka akcejis organizatore i portala lakuga.lv redaktore Vineta Vilcāne.
Akcejai atsasaukušys jau vairuokys latgaliskuos vītys – Latgolys viestnīceiba GORS, Baļtinovys vydsškola, Rēzeknis nūvoda pošvaļdeibys īstuodis, kopejneica “Ausmeņa Kebabs”, Latvejis Radejis Latgolys studeja, Daugovpiļs Universitate i c., tymā skaitā ari uorpus Latvejis – Adama Mickeviča universitate Poznaņā (Pūleja) i Latvejis gūda konsulats Hjūstonā (ASV).
Portals lakuga.lv aicynoj uzleimi sajimt īstuodis, organizacejis, uzjāmumus, kuri grib paust pozitivu attīksmi pret latgalīšu volūdu, i pīlikt tū radzamā vītā, pīmāram, iz īejis durovu. Uzleimis sajimšona nauzlīk nikaidus pīnuokumus i saisteibys. Tū sajāmušuos vītys ir atzeimuotys eipašā kartē.
Uzleimi var lītuot ari digitalā formatā, kai ari izdrukuot i izmontuot piec sovu īskotu, ka tī nav pretrunā ar akcejis ideju. Uzleimi aizlīgts puordūt, ari tod, ka persona tuos izgataveišonā investiejuse sovus leidzekļus. Uzleime lejupīluodiešonai ITE.
Akceja ir daļa nu projekta “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (projekta leigums Nr. 778384) aktivitašu.
“Latgalīšu kulturys ziņu portals lakuga.lv” ir pasaulī vīneigais tikai latgalīšu rokstu volūdā saturu rodūšs medejs. Tymā var skaiteit par Latgolys i latgaliskuos kulturys aktualitatem, intervejis ar sabīdreibā zynomim cylvākim, kai ari atrast vierteigus materialus latgalīšu volūdys raksteitprasmis uzlobuošonai. Portalu lakuga.lv uztur bīdreiba “Latgolys Studentu centrs”, bīdreibys dorbu 2020. godā atbolsta Vaļsts kulturkapitala fonds profesionalu navaļdeibys kulturys organizaceju atbolsta programys ītvorūs.