Vokora styga – Ej šī iz munom trepem!

Vīns nu 13. – 19. septembrim nūtykušuos Latgaliskuos nedelis īvodpasuocīnim beja nu jau par tradiceju īdibynuotuo – Vokora styga – atraktivs orientiešanuos pasuocīns Reigā ar mierki jaunūs studentus nu Latgolys īpazeistynuot ar Reigā atrūnomom latgaliskom vītom, pasuocīnim i informēt par Latgolys Studentu centra aktivitatem.

Itymā reizē 14. septembra Vokora stygys vadmotivs beja dažaidys spēlis i vītys, kas juozyna Reigys centrā i kur Latgaliskuos nedelis i cytuos reizēs nūteik kaidi latgaliski pasuocīni. Vokora stygā pīsadalieja 12 jaunīši nu dažaidom gon Latgolys, gon pī-Latgolys vītom i augstškolom – nu Reigys i Jelgavys. Dažaidu najaušeibu rezultatā jau ūtrū godu nūzeimeigs objekts Vokora stygys nūrisēs beja ailinīka Raiņa pīmineklis, līkūt maneit, ka ari jam ir kaids sakars ar Latgolu. Suokuos dalinīkus gaidieja īsapazeišonuos spēlis tī pot Esplanadē, bet piec sadaliešonuos 6 komanduos orientiešanuos varēja suoktīs.

Jaunīšus Reigys Vacreigys daļā i tuos apleicīnē gaidēja 9 kontrolpunkti, kurus vādzeja atrost ar dažaidu nūruožu paleidzeibu:

1. Tautā teik saukta par Alma mater. Draudzeiga studentim nu jau 90 godus. Meklej bulvari ar dižana ailinīka vuordu! Tī aizdavums, kurā svareiga spieja preceizai pasceit guodus i byut draugūs ar laiku. Atbiļde: Latvejis Universitate – spēlis Latgalīšu alisas laukums, kurā dalinīki varieja puorbaudeit sovys spējis nu suoku saprast i tod izskaidruot ūtram latgalīšu vuordus.
2. Vysys slīdis vad iz Reigu. Meklej Reigys auškuokū laika pavielnīku. Tī – kur nūliksi, tī pajimsi – vītā, kas iz laiku atvīgloj Tovu nostu. Lai itū vītu atrostu, sekoj čemodanam. Atbiļde: Centraluo dzelzceļa staceja – Erudicejis spēle par Latgolu, kurys golvonuo tema beja Drukys aizlīguma 105. godadīna.
3. Kur navad slīdis, tī vad celi. Pīktdīnuos studenta golvonais aizdavums – nanūkavēt autobusu – sāta sauc! Aiz sarokstim meklej Latveju. Kai Tev ar geografeju? Atbiļde: Reigys autoūsta – ite kotrs pots varieja puorsalīcynuot par sovom zynuošonom Latgolys geografejā.
4. Pa nakti tī guļ tramvaji i trolejbusi, bet pa nakti tī ari prīcojas ļauds i vīna nu vītom Reigā, kur vytu nakti var prīcuotīs latgaliski! Meklje pyrmū Vacreigys īlu piec bulvarim! Esi gotovs muzykalam puorbaudiejumam? Atbiļde: Klubs DEPO (ar nūruodi iz Taiseits Latgolā koncertu) – īspieja kotram koč reizi dzeivē sadzīdzuot latgaliski ar kuojuos apautim gumejnīkim
5. Kai Krīvejis ūtrei leluokuo piļsāta var byut Reigā? Var. Caturtdīnuos bīžai pīpildeita ar lobim ļaudim i pīskandynuota ar latgalīšu volūdu. Atbiļde: Kopejneica Ļeņingrad (par gūdu Dabasu Durovu klipa prezentacejai i LA-LA-DRA pasuocīnim)
6. Augsta škola tehniskim studentim. Pi poša Reigys geografiskuo i administrativuo centra. Lai puorts drupeit atsapyuš, bet struodoj kuojis! Atbiļde: Reigys Tehniskuo Universitate – pyrmais aizdavums – atrost nuokušā dīnā paradzātuo pasuocīna – Tehnodzeja – nūrisis vītu i ūtrais – pareizi nūduocuot kaidu latgalisku danci.
7. Itū laukumu pa dīnom pīskandynoj olu kausu škindūņa, ļaužu smīkli, bet svātdīnuos daudzu bazneicu zvoni. Nu iteinis puor Latveju caur frekvencem kotru nedeli izskaņ vysys Latgolys vuords. Atbiļde: Dūma laukums – spēlis Māmais šovs laiks, kurymā jaunīšim beja juoparuoda i juoatmiņ dažaidys latgalīšu studenta sadzeivē nūdereigys lītys i procesi.
8. Kai Luvra ar piramidom! Nakti prīcej ar skaistu gaismys i guņs spēli! Pošu reizi tī teik spūdrynuota pērle, bet cytim reizem ari latgaliskys idejis! Atbiļde: Kongresu noms – otkon dzīduošonys i spēlēšonuos aizdavumi.
9. Latgolys Studentu centra štabs. Meklej Antonejis īlu 8. Ej iz ūtrū stuovu, tī pa kreisi, tod pa labi, otkon pa labi i klauvej pi duru pošā gola pa kreisi! Atbiļde: LgSC Reigys birojs – tautā saukts par Tonis biroju – muzykals aizdavums – spēle Uzmini melodeju!, kurymā dalinīkim nu dzīšmu fragmentim beja juoatmiņ 10 latgalīšu dzīsmis i tūs izpiļdeituoji.

Finišā – Esplanadē – Vokora stygys dalinīki tyka cīnuoti ar čaju. Paļdis Latgolys Regiona atteisteibys agenturai! Kai ari varēja nūsavērt i īsasaisteit LU Pedagogejis i psihologejis fakultatis teātra aktivistu – tautā sauktu par Bumbulim – improvizacejis spēlēs. Piec rezultatu apkūpuošonys par vysu veiksmeiguokū komandu izaruodeja Grabuli, bet vysi Vokora stygys dalinīki sajiema bolvys nu Latgolys Studentu centra – latgalīšu dzejis antologeju Susātivs i duovonu kartis gruomotneicā, grupys Borowa MC diskus Ui, lobs!, kai ari īejis biletus iz Latgaliskajā nedeļā paradzātajim pasuocīnim – Taiseits Latgolā klubā DEPO, Upītes Uobeļduorzu i grupys Borowa MC koncertim.