Vuiceitīs apdzīduot i repuot latgaliski – aicynojam jaunīšus iz seminaru ap tradicionalū i myusu dīnu kulturu
Sastdiņ, 11. novembrī, Leivuonā byus rodūšūs seminaru cykla “SPĀKA LAB” seminars “Kurs dreižuok(s): apdziedāšana vai reps? Tradicionālā kultūra un jaunieši”, kurā jaunīši, folklorys kūpu dalinīki i vadeituoji, kai ari cyti interesenti varēs izzynuot vaira par pošu jaunīšu pīredzi, dorbojūtīs tradicionaluos kulturys procesūs, myusu dīnuos popularuos repa muzykys vītu latgalīšu kulturā, kai ari pīsadaleit diskusejā i paraudzeit uzvarēt eksperimentalā apdzīduošonys “ceiņā”.
Seminars 11. novembrī nu 10.00 da 16.00 stuņžu nūtiks Leivuona nūvoda Multifunkcionalajā jaunīšu iniciativu centrā “Kvartāls”. Leivuons kai nūtikšonys vīta izvālāts, prīcojūtīs par nūvoda itūgod Izgleiteibys i zynuotnis ministrejis organizātajā konkursā “Latvejis Jaunīšu golvyspiļsāta” dabuotu uzvaru i titulu “Latvejis Jaunīšu golvyspiļsāta 2024”.
“SPĀKA LAB” seminarā ar sovu pīredzi tradicionaluos dzīduošonys prasmu puormuontuošonā stuostā “Voi tradicionaluos dzīduošonys simpozejs ir interesantuoks par TikToku?” pasadaleis Kate Slišāne nu Upeitis kulturtelpys, par vareibom, kū dūd aktiva pīsadaleišona tradicionaluos kulturys nūtikšonuos, “No pirmā daņča līdz koncerttūrei Brazīlijā. Unboxing” stuosteis folklorys kūpys “Tarkšķi” daleibneica i socialūs medeju satura veiduotuoja Katrīna Karele. Latvejis Nacionaluo kulturys centra direktore Signe Pujāte stuostā “Latviešu tradicionālā dziedāšana. Pieci prieka elementi nākotnei” izceļs tradicionaluos dzīduošonys elementus, kas varātu byut interesanti kotram, bet latgalīšu repere Ūga stuostā “Voi piec 100 godu reps byus latgalīšu tradicionaluo muzyka?” pasadaleis ar sovu pīredzi hip-hop kulturā i tuos perspektivu Latgolā.
Seminara ūtrajā daļā paradzāta diskuseja “Tradicionālās kultūras un džen Zī ideālais randiņš. Kur satikties?”, kurā leidz ar Kati Slišāni, Katrīnu Kareli, Ūgu i Signi Pujāti, pīsadaleis folklorys kūpys “Rūtoj” vadeituoja Ilze Valaine, folklorys kūpys “Turki” vadeituoja Terēzija Rubene, kai ari 14. Saeimys deputate, folklorys kūpu dalineica i jaunīšu lītu specialiste Leila Rasima. Diskusejā byus saruna par tū, kas interesej myusu dīnu jaunīšu, voi itamuos interesēs ir vīta ari tradicionalajai kulturai i kai tam, kū saprūtam ar tradicionalū kulturu, byut konkurētspiejeigam myusu dīnu kulturys procesūs. Diskuseju vadeis Leivuona nūvoda Multifunkcionaluo jaunīšu iniciativu centra “Kvartāls” vadeituoja Marija Driksna.
Nūtikšonys pādejā daļā tuos daleibnīkus gaida praktiskuos darbneicys, kuruos varēs vuiceitīs apdzīduot i repuot, lai piečuok darbneicu nūslāgumā paraudzeitu spākus improvizātā obeju muzykys stylu saceņseibā. Repuošonys nūdarbeibu vadeis Ūga, bet apdzīduošonys prasmis paleidzēs īsavuiceit folklorys kūpys “Turki” vadeituoja Terēzija Rubene i folklorys kūpa “Rūtoj” (vadeituoja Ilze Valaine).
Seminara aktivitašu vydā kotram interesentam byus vareiba paraudzeit īrunuot volūdys atteisteibys projekta “Bolsu tolka” teikumus latgalīšu volūdā, snādzūt sovu īguļdejumu latgalīšu volūdys īspieju atteisteišonai modernūs tehnologeju vidē, bet piec seminars nūsaslēgs ar folklorys kūpys “Rūtoj” spālātajim daņčim.
Leivuonā paradzātuo seminara mierkauditoreja ir jaunīši, kurus interesej vysaidu stylu muzyka i kultura, jaunuotnis lītu specialisti, folklorys kūpu daleibnīki i vadeituoju, kai ari tymā drūsai var pīsadaleit kotrys tradicionaluos i/voi lataglīšu kulturys interesents. Pylna Leivuona seminara programa ite: https://ej.uz/SPAKA-LAB_Leivuons. Pīsateikt seminaram aicynojam da 9. novembra ITE. Taipat seminars byus ari latgalīšu kulturys kusteibys “Volūda” jaunīšu izaugsmis i Latgolys izzynuošonys programys “LTG tu dū!” daļa, papyldynojūt programys jaunīšu zynuošonys par tradicionalū dzīduošonu i latgalīšu kulturu.
Pyrmī “SPĀKA LAB” rodūšī seminari, kas veļteiti Latgolys kulturys dzeivis organizātuoju i navaļstiskūs organizaceju puorstuovu kapacitatis styprynuošonai i ideju apmaiņai, nūtyka ituo gods janvarī Daugovpilī i Kuorsovā, dabojūt jaunys voi styprynojūt asūšuos prasmis komunikacejis i nūvodpietnīceibys/vītu stuostu veiduošonys nūzarēs. Video īsavieršona seminara diskusejuos i lekcejuos ITE. Rudiņa seminaru cyklā “SPĀKA LAB” paradzāts īprīšk apraksteitais pasuokums 11. novembrī Leivuonā, kai ari seminars “Kur dabūt ideju savai kultūrtelpai un kā Latgali svinēt 2025. gadā?” 23. novembrī Preiļūs.
Pyrmī “SPĀKA LAB” rodūši seminari, kas veļteiti Latgolys kulturys dzeivis organizātuoju i navaļstiskūs organizaceju puorstuovju kapacitatis styprynuošonai i ideju apmaiņai nūtyka ituo gods janvarī Daugovpilī i Kuorsovā, dabojūt jaunys voi nūstyprynojūt asūšuos prasmis komunikacejis i nūvodpietnīceibys vītu/stuostu veiduošonys nūzarēs. Video īroksti nu seminaru nūsaverami ITE. Rodūšūs seminaru cyklu reikoj latgalīšu kulturys kusteiba “Volūda” i bīdreiba “New East”, sasadorbojūt ar Leivuona nūvoda jaunīšu centru “Kvartāls”, bīdreibu “riktīgi NAISS”, Preiļu nūvoda pošvaļdeibu i Latgolys Turisma asociaceju. Pasuokuma nūrisi pabolsta Latvejis Republikys Kulturys ministreja, Latvejis Nacionalais kulturys centrs, kai ari Sabīdreibys integracejis fonds.