Tūp video nūdarbeiba bārnim par latgalīšu volūdu “Lels, lels okeans”
Latgalīšu kulturys kusteiba “Volūda”, sasadorbojūt ar literati Ilzi Spergu, muziki, pasuokumu vadeituoju i akteri Kristapu Rasimu i grupu “Rupuči”, veidoj 30 minutu garu video nūdarbeibu–pīdzeivuojumu pyrma školys i školys mozuokūs klašu vacuma bārnim, kurā “Rupuči” paleidzēs saprast, kas ir latgalīšu volūda, īvuiceis sasavasaluot latgaliski, kai ari latgaliski nūsaukt skaitļus, kruosys, burtus, godalaikus i cytys temys.
Grupa “Rupuči” 2021. godā roduos, kod Kristaps Rasims atsasauce latgalīšu kulturys kusteibys “Volūda” (tūlaik bīdreibys “LgSC”) aicynuojumam radeit dzīsmis ar Ilzis Spergys dzejūļu tekstim nu gruomotys “Vuškeņa iz pļovys”. Tai izguoja albums ar taišni taidu pošu nūsaukumu, kuruo dzīsmis godu laikā mozī i lelī klauseituoji cīši īmeiļuoja. “Rupuči” – Ernests, Terēze i Kristaps Rasimi, kai ari Luocs nu Meža – turpynuoja dorbuotīs: radeja dzīšmu videoklipus, sovus video i ari koncertēja. Pyrma vairuoku godu “Volūdai” roduos ideja par latgalīšu volūdys video nūdarbeibu “Lels, lels okeans”, kas paleidzātu bārnim (pyrmaškolys i 1.–6. klasis vacumā) vysā Latvejā izzynuot, kas ir latgalīšu volūda, kai ari jamā īsavuiceit kaidus vuordus. Itūgod ar Latgolys kulturys programys 2024 atbolstu ideja teik eistynuota i dreiži bārnim, saimem i školuotuojim byus daīmama video nūdarbeiba (ar kūpejū garumu 30 minuti, bet nūsaverama ari treis daļuos), kurā, izstuostūt vairuokys temys – latgalīšu volūdys vīty Latvejā, sasavasaluošonu, alfabetu, skaitļus, kruosys, godalaikus, dzeivinīkus, mīsys dalis, iedīņus, saimis lūcekļus – “Rupuči” paleidzēs izzynuot vaira par latgalīšu volūdu. Pīdzeivuojumā “Lels, lels okeans” pyrmatskaņuojumu pīdzeivuos ari jauna “Rupuču” dzīsme ar Ilzis Spergys vuordim – “Pavasars”.
Video nūdarbeibys scenareja leidzautori ir literate Ilze Sperga i Kristaps Rasims ar grupu “Rupuči”. Nūdarbeibu papyldynuos dorba lopys, kuruos vairuokuos aizdavumūs bārni varēs nūstyprynuot pīdzeivuojumā dzierdātū i izzynuotū.
Projekta eistermeņa mierkis ir interaktivys i muzykalys video nūdarbeibys par latgalīšu volūdu radeišona bārnim pyrma školys i 1.–6. klašu grupys vacumā. Ilgtermeņa mierkis ir bārnu izpratnis i zynuošonu veicynuošona par latvīšu volūdys byušonu vysaidai – latgalīšu volūdu kai viesturyskū latvīšu volūdys paveidu.
Video tūp ar Vaļsts kulturkapitala fonda mierkprogramys „Latvīšu viesturyskūs zemu atteisteibys programys“ finansialu atbolstu. Programu Latgolā administrej Latgolys regiona atteisteibys agentura.
