Tīšraidē radejā i kluotīnē Rēzeknē pīraksteits septeitais diktats latgalīšu rokstu volūdā

Sastdiņ, 14. oktobrī, 18.15 vokorā Latvejis Radejis Latgolys studeja, latgalīšu kulturys kusteiba “Volūda” i latgalīšu kulturys ziņu portals lakuga.lv septeitū reizi aicynuoja raksteit pasauļa diktatu latgalīšu rokstu volūdā. Diktatu varēja klauseitīs sātā pi radejis voi video formatā portalā lakuga.lv i socialajūs teiklūs, kai ari kluotīnē Rēzeknē, Latgolys viestnīceibā GORS.

Ituo gods diktatā aktrise Katrīna Griga skaita pyrmuo komiksa bārnim latgaliski “Sunāns breiveibā”, portala lakuga.lv redaktoris Laurys Melnis eipaši diktatam saraksteitū tekstu. Diktata teksts beja sagataveits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus.

Kluotīnē raksteit diktatu beja vareiba divejis reizis – sadarbeibā ar Latvejis Radejis Latgolys studejis jaunīšu raidejumu “Pīci breinumi” 2. oktobrī pyrmī diktatu pīraksteit raudzeja Austrumlatvejis Tehnologeju vydsškolys (ATV) školāni (piec diktata topušū raidejumu i sarunu ar jaunūšim ap latgalīšu volūdu var nūsaklauseit ITE), bet pošā diktata dīnā, 14. oktobrī, raksteituojus kluotīnē iz Latgolys viestnīceibu GORS aicynuoja latgalīšu kulturys kusteiba “Volūda”, pīduovojūt tū rēzeknīšim i piļsātys gostim kai vīnu nu spēlis “Latgalīšu volūdai draudzeiga vīta – ite Rēzekne!” aktivitašu. Kluotīnē taidu vareibu izmontuoja seši raksteituoji nu Rēzeknis, Rēzeknis nūvoda, Reigys i Babeitis. Kluotīnis raksteituojim kai ATV, tai GORĀ pyrma diktata beja īspieja izzynuot puora padūmu latgalīšu rokstu volūdys pareizraksteibā.

Diktata raksteituoji kluotīnē voi tīšsaistē diktata tekstu varēja īsnēgt puorbaudei – škārsteikla platformā sajimti vaira nakai 50 teksti puorbaudei, kluotīnē diktata teksta klaidu puorbaudei nūdeve treis raksteituoji, puorejī izmontuoja īspieju puorbaudeit klaidys pošim iz vītys.

Ka kaidu intersej septeitū diktatu latgalīšu rokstu volūdā pīraksteit niu, tū var izdareit ITE.

Diktatu latgalīšu rokstu volūdā organizej latgalīšu kulturys kusteiba “Volūda”, latgalīšu kulturys ziņu portals lakuga.lv i Latvejis Radejis Latgolys multimedeju studeja, bet atbolsta Latvejis Radeja, Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu i Vaļsts kulturkapitala fonds. Diktata raksteišona kluotīnē Rēzeknē beja vīna nu spēlis “Latgalīšu volūdai draudzeiga vīta – ite Rēzekne!” aktivitašu, tei eistynuota ar ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu.

Fotogalerejā: septeituo diktata latgalīšu rokstu volūdā raksteišona Rēzeknē, foto Amanda Anusāne i Edeite Laime