SPĀKA LAB. Tradicionaluos kulturys vīta myusu dīnu jaunīšu dzeivē
Sastdiņ, 11. novembrī, Leivuonā nūtyka rodūšūs seminaru cykla “SPĀKA LAB” seminars “Kurs dreižuok(s): apdziedāšana vai reps? Tradicionālā kultūra un jaunieši”, kurā pīsadaleit aicynuoti beja jaunīši, folklorys kūpu dalinīki i vadeituoji, programys “LTG tu dū!” dalinīki, kai ari cyti interesenti.
Seminarā varēja izzynuot vaira par pošu jaunīšu pīredzi, dorbojūtīs tradicionaluos kulturys procesūs, myusu dīnuos popularuos repa muzykys vītu latgalīšu kulturā, kai ari pīsadaleit diskusejā i paraudzeit uzvarēt eksperimentalā apdzīduošonys “ceiņā”. Seminars nūtyka multifunkcionalajā jaunīšu iniciativu centrā “Kvartāls” i Leivuons kai nūtikšonys vīta izvālāts, prīcojūtīs par nūvoda itūgod Izgleiteibys i zynuotnis ministrejis organizātajā konkursā “Latvejis Jaunīšu golvyspiļsāta” dabuotu uzvaru i titulu “Latvejis Jaunīšu golvyspiļsāta 2024”.
“SPĀKA LAB” seminarā ar sovu pīredzi tradicionaluos dzīduošonys prasmu puormuontuošonā stuostā “Voi tradicionaluos dzīduošonys simpozejs ir interesantuoks par TikToku?” pasadaleja Kate Slišāne nu Upeitis kulturtelpys, par vareibom, kū dūd aktiva pīsadaleišona tradicionaluos kulturys nūtikšonuos, “No pirmā daņča līdz koncerttūrei Brazīlijā. Unboxing” stuosteja folklorys kūpys “Tarkšķi” daleibneica i socialūs medeju satura veiduotuoja Katrīna Karele. Latvejis Nacionaluo kulturys centra direktore Signe Pujāte stuostā “Latviešu tradicionālā dziedāšana. Pieci prieka elementi nākotnei” izcēle tradicionaluos dzīduošonys elementus, kas varātu byut interesanti kotram i sovu sasatikšonu ar tradicionalū dzīduošonu, bet latgalīšu repere Ūga stuostā “Voi piec 100 godu reps byus latgalīšu tradicionaluo muzyka?” pasadaleja ar sovu pīredzi hip-hop kulturā i tuos perspektivu Latgolā.
Seminara ūtrajā daļā nūtyka diskuseja “Tradicionālās kultūras un džen Zī ideālais randiņš. Kur satikties?”, kurā leidz ar Kati Slišāni, Katrīnu Kareli, Ūgu i Signi Pujāti, pīsadaleja folklorys kūpys “Rūtoj” vadeituoja Ilze Valaine, folklorys kūpys “Turki” vadeituoja Terēzija Rubene, kai ari 14. Saeimys deputate, folklorys kūpu dalineica i jaunīšu lītu specialiste Leila Rasima. Diskusejis dalineicys runuoja par tū, kas interesej myusu dīnu jaunīšu, voi itamuos interesēs ir vīta ari tradicionalajai kulturai i kai tam, kū saprūtam ar tradicionalū kulturu, byut konkurētspiejeigam myusu dīnu kulturys procesūs. Diskuseju vadeja Leivuona nūvoda Multifunkcionaluo jaunīšu iniciativu centra “Kvartāls” vadeituoja Marija Driksna. Diskusejis video īroksts nūsaverams ite:
Nūtikšonys pādejā daļā tuos daleibnīkus gaideja praktiskuos darbneicys, kuruos varēja vuiceitīs apdzīduot i repuot, lai piečuok darbneicu nūslāgumā paraudzeitu spākus improvizātā obeju muzykys stylu saceņseibā. Repuošonys nūdarbeibu vadeja Ūga, bet apdzīduošonys prasmis paleidzēja īsavuiceit folklorys kūpys “Turki” vadeituoja Terēzija Rubene i folklorys kūpa “Rūtoj” (vadeituoja Ilze Valaine). Repa i apdzīduošonys saceņseibys rezultatu nūsavērt var ite:
Seminaru “SPĀKA LAB” reikuoja latgalīšu kulturys kusteiba “Volūda” i bīdreiba “New East”, sasadorbojūt ar Leivuona nūvoda jaunīšu centru “Kvartāls” i bīdreibu “riktīgi NAISS”. Pasuokuma nūrisi pabaļsteja Latvejis Republikys Kulturys ministreja, Latvejis Nacionalais kulturys centrs, kai ari Sabīdreibys integracejis fonds.
Fotogalerejā: īsavieršona “SPĀKA LAB” Leivuonā, foto Amanda Anusāne/latgalīšu kulturys kusteiba “Volūda”
Seminars i tuo diskuseja beja daļa nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
