Sataiseita mobiluo lītuotne latgalīšu volūdys īsavuiceišonai
Vuiceitīs latgalīšu volūdu palics daudz aizraunūšuok. Niu tū var dareit ar mobiluos lītuotnis “Vasals!” paleidzeibu, tamā daīmamys spēlis vysaidim latgalīšu volūdys vuiceišonuos leiminim. Lītuotni radejuse Latgalīšu kulturys kusteiba “Volūda”.
Lītuotne “Vasals!” paradzāta mobilajim telefonim i planšetem. Lītuotnē daīmamys četrys spēlis. Spēlē “Vuordi” var papyldynuot latgalīšu volūdys vuordu kruojumu, spēlē “Biļdis” juoatpazeist popularys Latgolys vītys, spēlē “Muzyka” juosaklausa latgalīšu dzīšmu vuordi, bet spēlē “Gramatika” var dazynuot daudz vierteiga rokstu volūdys izkūpšonai.
“Vīns nu lobuokūs veidu, kai vuiceitīs volūdu, ir spēlēt spēlis. Tys ir aizraujūšai i jautrai. Turu nūceju, ka itaidā veidā vuiceitīs latgalīšu volūdu byus interesantai na viņ pošim latgalīšim, tok ari puorejim latvīšim. Ir svareigai, ka latgalīšu volūda pasaruoda modernajuos tehnologejuos, jo tys volūdu padora daīmamuoku plotuokai sabīdreibys daļai, ceļ volūdys prestižu i ari nūdrūsynoj volūdai byušonu iz prīšku,” soka mobiluos lītuotnis “Vasals!” idejis autore Vineta Vilcāne.
Latgalīšu kulturys kusteibys “Volūda” sataiseituo mobiluo lītuotne “Vasals!” bez moksys Google Play Store daīmama Android mobilajom īreicem.
Lītuotni var zamynluodēt ITE.
Latgalīšu kulturys kusteiba “Volūda” ir vīna nu aktivuokūs latgalīšu sabīdriskūs organizaceju, kas struodoj latgalīšu volūdys saglobuošonai i populariziešonai. Itei ir jau ūtrei bīdreibys izstruoduotuo mobiluo lītuotne latgalīšu volūdys populariziešonai. Pyrma puora godu tyka radeitys bezmoksys digitaluos uzleimis “Latgalian Stickers” sazinis platformom WhatsApp i Telegram.