Rēzeknē nūtiks mozuok lītuotajom i regionalajom volūdom veļteits storptautysks seminars
Nu 1. da 4. maja Rēzeknē nūtiks storptautysks seminars “Mozuok lītuotūs volūdu dokumentiešona izgleiteibys vajadzeibom”, kuru organizej latgalīšu kulturys kusteiba “Volūda”. Seminarā pīsadaleis lektori nu Pūlejis, Niderlandis, Igaunejis i Latvejis augstškolu, zynuotnyskūs instituceju i navaļstiskūs organizaceju. Seminara dalinīki daleisīs pīredzē i nūvāruojumūs regionalūs i mozuok lītuotūs volūdu dokumentiešonā, izgleiteišonā i vuiceišonā, kai ari volūdu saglobuošonā i atdzeivynuošonā. Interesentim ir vareiba seminarā pīsadaleit kai klauseituojim.
Seminarā “Mozuok lītuotūs volūdu dokumentiešona izgleiteibys vajadzeibom” tiks apsavārti taidi temati kai kūpīnu attīksme pret volūdu standartizaceju, dažaidu digitalūs reiku, pīmāram, volūdys korpusu pīduovuotuos īspiejis volūdu vuiceišonā, taipoš lektori pīsaskars problemom, ar kurom juosasastūp, vuicūt mozuok lītuotuos volūdys i regionaluos volūdys i izstruodojūt vuiceibu materialus. Prezentacejis byus veļteitys taidu volūdu kai lībīšu, dzūku, lucu, greko, jaunnorveģu, i, prūtams, latgalīšu volūdys situacejai i problematikai.
Storptautyskais seminars nūtiks nu 1. da 4. maja Rēzeknē, Latgolys Kulturviesturis muzeja telpuos (Atbreivuošonys aleja 102). Interesenti, kuri gribēs seminarā pīsadaleit kai klauseituoji, ir aicynuoti registrētīs daleibai da 27. apreļa, aizpyldūt anketu https://forms.gle/yrmepCv7ik8kuArh6. Seminara dorba volūda ir angļu volūda, programa apsaverama zamuok i lakuga.lv.
Seminars “Mozuok lītuotūs volūdu dokumentiešona izgleiteibys vajadzeibom” ir vīna nu projekta “Mozuok lītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING, Nr. 778384” (Minority Languages, Major Opportunities. Collaborative Research, Community Engagement and Innovative Educational Tools — COLING, Nr. 778384) aktivitašu.