Reigys gaiss i jauni zinuotnis atkluojumi!

Latgolys Studentu nedelis ūtrā dīnā 14. septembrī vacuoki i jaunuoki studenti tika aicynuoti nu jau iz tradicionalū latgaliskū orientiešonuos Reigā – vokora stygu, kas itymā godā beja zam lozunga: „Atzolīšim pa pādom ci piparmātru čaja kauss”, kurā, aplīcynojūt vysys lobuokuos atzolīša prasmis i eipašeibys, saceņseibu dalinīkim beja īspieja tikt pi piparmātru čaja kausa!

Vysu pyrma sasapazeišona – kotram juoizzeimoj sova pāda i juopastuosta, nu kurys pusis Latgolā/Latvejā jis ir. Cytam pāda, bet cyts itai lītai pīguos nūpītnuok!

Pyrmais aizdavums – muzykalais. Atzolīts ir dzīduotuojs – gon solo, gon kuorī! Vysim kūpā juosalīk kaidys latgalīšu dzīsmis teksts, bet individuali juozyna, kura latgalīšu grupa dzīd kuru dzīsmi. Vyss gon ite beidzuos na ar dzīsmem, bet kūpeigu “Sienīs, sienīs” sadoncuošonu!

Sova veikleiba Vokora stygys dalinīkim juopīruoda iz Vanšu tylta. Puorlīcinūšu uzvaru itymā saceņseibu pūsmā paruoda styprais dzimums! Pi reizis iz tylta teik nūkerts pylns maiss ar Reigys gaisu!

Piec fiziskom aktivitatem pīsavieršona gareigam pasauļam. Kausa izceinis dalinīkim juoatrūn latgaliska pazeime Nacionalajā teatrī. Nūsaskaidroj, ka oktobri tī tiks pyrmizruodeita Danskovītis luga nu Ontona i Annis serejis zam nūsaukuma “Latgola.lv”

Tuoļuok ceļs vede iz Vacreigys pusi – iz Jākuba katedrali i Marejis Magdalenys bazneicu. Pi pyrmuos atsarūn Franča Trasuna pīminis plāksne, bet ūtrymā ari Reigā ir vareibā klauseitīs mišu latgaliski!

Nu religejis pi zinuotnis i Reigys Tehniskuos Universitatis paspuornē teik atkluots jaunū zinuotnīku puļceņs! Latgalīšu studentim ir gona ar pīcom minutom, kab radeitu jaunys lītys: portativū latgalīšu muoju, ekoloģiskū kugi, ūdu kierieju, malnū ideju trubu, termoforu-termosu i myužeigū vardivi.

Tuoļuok nu vīnys augstys školys iz ūtru. Pi Latvejis Universitātis volūdys vaicuojuma puorbaudiejumi. Voi tu zini, kū nūzeimoj reps? Voi zini, kas latgalīšim ir morgs? Morgs izaruoda ir pleivurs. Par itū specbolva – karteņa ar pantalonu kolekceju! 😉

Kod mēle volūdā īvingrinuota, var giutīs pi leluokim dorbim. Vokora stygys tradiceja ir Raiņa pīmineklis i aiļu skaitiejumi pi tuo. Ari itūgod bez tuo nikur. Jaunū ailinīku gora dorbi kaidā cytā īrokstā.

Vysu beidzūt draudzeiga čaja dzeršonys i apbolvuošonys ceremoneja Tonis birojā. Par pyrmū Piparmātru čaja kausa īgivieju ir klivuse ari pīredziejuse atzolīte – Vineta Vilcāne nu Preilim! Sveicom i suminajom!

Bet ar puorejim Vokora stygā nūteikti teikamīs piec goda! 😉

Turpynuojumā foto reportaža nu kausa izceinis: