Pyrmī latgalīšu pādi vad iz Vuoceju i Kazahstanu

Juņa suokumā “Latgolys Studentu centrs” Reigā atkluoja jaunu tematiskūs pasuocīņu sereju – sarunys ar latgalīšu pasauļa apceļuotuojim “Latgalīša pādi pasaulī”. Pyrmajā tematiskajā vokorā par sovu pīredzi dzeivojūt uorpus Latvejis pasadaleja divi fizmati i LgSC bīdri Laura Putāne i Guntis Šmaukstelis.

Pyrmū “Latgalīša pādi pasaulī” vokoru kai “īsiļdeituoja” atkluoja Laura Putāne, kas sovulaik dorbuojusīs kai Latgolys Radejis programmys “Čaja vokors” vadeituoja, bet niu jau puora godus par sovu sātu sauc Vuoceju, kur jei struoduojuse kai breivpruoteigais jaunīšu centrā mozā piļsieteņā Nagold, bet niu struodoj jaunīšu organizacejā i dzeivoj Štutgartē. Laura vaira pastuostieja par sovu tādinejū dorbu, kurā jei organizej taidys kai dorba nūmetnis jaunīšim nu vysa pasauļa – jaunīši sabrauc kaidā piļsātā i, strodojūt nedeli ci vaira, padora kaidu lobu dorbu, pīmāram, īkuortoj i sakūp piļsātys parku. Laura zynuoja saceit, ka Eiropā i cytur pasauļā taidys nūmetnis jaunīšim ir cīši popularys i itūgod tikšūt organizātys ari Latvejā.

Ūtrs vokora stuostnīks beja gaideits ar eipašu napacīteibu: Guntis Šmaukstelis ir puorlīcynuots “fizmats”, aktivs latgalīts, pasauļa īkaruotuojs, daudzim pazeistams kai Šmikucs. Guntis ituo goda suokumā treis mienešus pavadieja breivpruoteiguo dorbā Kazahstanā, kur školās vuiceja angļu volūdu, bet leidza pedagoga gaitom izbaudeja ari Kazahstanys kuļturys i dobys koloritū byuteibu. Interesanta fotostuosta veidā klauseituoji tika īpazeistynuoti ar Kazahstanys sovpateibom i juo pīdzeivuojumim ari sābru zemē Tadžikistanā, kur Guntis devēs piec breivpruoteiguo dorba gaitu beigom. Klauseituoji izzynuoja par Kazahstanys zīmu skorbumu, cenom i dzeivis leimeni, vītejim školānim i studentim, vaļsts dzeivis izskotim i biznesa “taiseišonu”, kai ari Guntis lobpruot deve sovpateigu Latvejis i Kazahstanys saleidzynuojumu.

Piec obu stuostu nūsaklausiešonuos, skaidrs ir vīns – aktivs i darbeigs latgalīts napazuss nivīnā pasauļa molā!

Tai kai LgSC bīdri puorsvorā ir aktivi jaunīši, kas regulairai īsasaista dažaidūz interesantūs pīdzeivuojumūs, dūduos ekspedicejuos I apceļoj dažaidys tyvys i tuolys zemis, planavuots, ka stuostu vokori “Latgalīša pādi pasaulī” klius par ciklisku tradiceju i īpazeistynuos ar daudzu cytu pasauļa valstu, kuruos bejušs latgalīši, kuļturu sovpateibom!

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.