Programys “LTG tu dū!” jaunīši diskutej par Latgolys turismu, pluovojūt ar laivom
Sastdiņ, 2. septembrī, programys “LTG tu dū!” jaunīši kūpā ar Lauru Spunderi nu Latgolys Turisma asociacejis izzynuoja Odumovys azaru i diskutēja par turismu Latgolā aktivitatē “Pīdzeivuojums laivā ap Latgolys turismu”.
Kab piec vosorys ar jaunu spāku īstartātu jaunīšu izaugsmis i Latgolys izzynuošonys programu “LTG tu dū!”, jaunīšim tyka pīduovuoti vairuoki varianti, ar kaidu aktivitati jī grybātu izsuokt rudiņa sezonu –vairuokums beja par laivuošonu. Daudzi laivuos sēdēs pyrmū reizi, tok jaunīšim tys nabeja izaicynuojums, taišni ūtraiži – vīnreizeiga īspieja paraudzeit, kai tys ir. Laivuošona tyka pīduovuota ar mierki vaira sasadraudzēt, īpasazeit ar Odumovys azaru i izzynuot vaira par turismu Latgolā, kai ari pastuosteit par sovom meiluokajom vītom ci interesantuokajim apskatis objektim, kūpā pasprīžūt ari par lobuokū turisma maršrutu vīnam nedeļgolam Latgolā. Reizē ari tyka sprīsts par tuoļuokū programys darbeibys veidim, metodem i pasuokumim.
Itamā reizē jaunīšim pīsavīnuoja ari Latvejis Radejis latgaliskuo jaunīšu raidejuma “Pīci breinumi” veiduotuoji, kab īraksteitu raidejumu, kura golvonuos temys ir škola i turisms. Raidejumu nu 13. septembra varēs dzierdēt Latvejis Radejis Latgolys studejis Youtube kanalā, Radio Pieci sātyslopā, Latvejis radejis mobilajā aplikacejā voi “Pīci breinumi” Spotify. Reizē raidejuma īraksteišona jaunīšim trenēja ari publiskajai runai vajadzeiguos prasmis, kas jim nūderēs iz prīšku.
Lels paļdis Latgolys turisma asociacejis puorstuovei Laurai Spunderei, kura na viņ pastuosteja par Odumovys azara solom i cytom sovpateibom, viesturi par pomtonu tiļteņu, iudiņa kvalitatis īmeslim i sūpluok asūšū olūtu, tok ari uzklauseja i apkūpuoja jaunīšu meiluokuos vītys sovā apleicīnē i Latgolā. Varbyut iz prīšku kūpā ar jaunīšim saīs sataiseit idealū turisma maršrutu pa Latgolu!
Fotogalerejā īsavieršona laivuošonā:
Jaunīšu izaugsmis i Latgolys izzynuošonys programa “LTG tu dū!” ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
