Pateik klauseitīs literaturu latgaliski? Aicynojam tolkā!
Ilzis Spergys stuostu kruojuma “Dzeiveiba” stuostus i Alda Bukša kriminalromanu “Bruoli” jau var nūsaklauseit radejis lasejumu/īstudiejuma versejuos. Niu aizsuokts dorbs pi vēļ četru autoru prozys dorbu īrokstim i publiciešonys audio formatā, tok, lai varātu vysu padareit piec īspiejis lobuok, aicynojam atbaļsteit itū dorbu!
Kūpā ar draugim – Latvejis Radejis Latgolys studeju – mums pateik, ka radejis eterā izskaņ ari latgalīšu literaturys dorbi. 2021. godā Ingys Misānis-Grasbergys bolsā izskanēja Ilzis Spergys stuostu kruojuma “Dzeiveiba” stuosti, bet 2023. goda pavasarī radejis īstudiejumā vasali 25 bolsi īdzeivynuoja Alda Bukša kriminalromana “Bruoli” spraiguo sižeta nūtikšonys. Lai tū varātu padareit, sovu daļu finansiejuma dalīk Latvejis Radeja, bet ūtru, rokstūt projektus, meklej latgalīšu kulturys kusteiba “Volūda”.
Niu struodojam pi tuo, lai akteru bolsūs jau itymā pavasarī izskanātu Raibuo, Annelis Slišānis, Egitys Kancānis i Valentina Lukaševiča literarī prozys dorbi – kotram vokoram vīns raksteituojs –, tok cikom mums nav īsadevs dabuot leidzfinansiejuma atbolstu (“Bruoļu” gadīnī tys saguoja viņ catūrtajā reizē). Deļ tuo, lai pi skaneiga rezultata tyktu dreižuok, aicynojam tolkā finansiali ar leluoku voi mozuoku zīduojumu atbaļsteit latgalīšu literaturys audio formata dorbu tapšonu. Ka ir patics tys, kū kūpā ar Latgolys studeju i īrokstu (muokslinīcyskū i tehniskū) vadeituoju, režisoru i komponistu Kristapu Rasimu (Reiga Productions) asam padarejuši da ituo, varim pasūleit, ka jaunais projekts byus vysmoz tikpat lobs, jo pi tuo struodoj jau īrostuo i dorbu kvalitati aplīcynuojušuo komanda.
Vīna radejis lasejumu vokora ilgums ir ap 50 minutu, tymā izskaņ vysmoz 5000 latgaliskūs vuordu. Jaunajā projektā paradzāts audio īroksts četru vokoru skaniešonai. Audio rezultats kotram interesentam byus breivi daīmams bez moksys.
Atbaļsteit var ar zīduojumu 10, 25, 50 voi 250 eiro lelumā (voi sevkurā cytā summu kombinacejā, cik kuram rūceiba i gribiešona ļaun). Latgalīšu kulturys kusteibai “Volūda” (juridiski – bīdreibai “LgSC”) ir sabīdryskuo lobuma organizacejis statuss. Platformā voluda.lv padareitais atbolsts teik registrāts kai zīduojums, leidza ar tū ir vareiba sajimt ari nūdūkļu atlaidis. Lels paļdis!
