Dzīsmis, danči, torgi, kaitys, svātbreids i dzīduojumi. Nūvodu dīna Latgolys sātā.

Ituo goda 2. majā Breivdobys muzejs reikuoja sezonys atkluošonys pasuocīni „Nūvodu dīna”, kura laikā Latgolys sātā saimnīkuoja bīdreibys „Latgolys Studentu centrs” aktivisti.

Aktivitatis Latgolys sātā suocēs ar tradicionalū svātbreidi Eleonorvilis bazneicā, kuru vadieja Reigys Gareiguo seminara audziekni. Piec tuo tyka atkluots sasadzīduošonuos maratons aktiera Kristapa Rasima vadeibā, kura laikā tyka izdzīduotys šmukuokuos i zynomuokuos latgalīšu tautys dzīsmis. Dzīsmis turpynuojuos ar dančim i vysi doncuotgrybātuoji tyka aicynuoti iz pļaveni izlūceit kuojis. Eipašu atsauceibu sadoncuošona giva beļģu jaunīšu vydā, kas izaruod sirdī ari ir eistyni latgalīši! 🙂

Eipašs izsvors pasuocīņa sludynuošonys laikā, tyka pīvārsts „Latgolys Zvaigžņu torgim”, kurim sovys personeiguos montys beja gotovi nūzīduot daudzi sabīdreibā zynomi ļauds – muziki Ingars Gusāns, Aigars Runčis, Juris Ostrovskis, Guntis Rasims, režisors Jānis Streičs, hokejists Ģirts Ankipāns. Vysi īgiutī zīduojumi tyktu izmontuoti „Latgalīša dzīšmu kladis” izdūšonai. Nu, tai kai nu „Latgolys Studentu centra” naatkareigu īmaslu dieļ pasuocīņs nabeja cīši apmaklāts, tod ari daudzys montys naatroda sovus jaunūs saiminīkus, bet par tom, kurys atroda, kas beja muzykys albumi, dzīšmu kladis izdūšonai tika sajimts pyrmais īguļdiejums 6,50 LVL apmārā. Tai kai myusim pošim ideja par torgim cīši pateik, tod ar montu eipašnīku atļauji kaidā nu LgSC pasuocīnim tiks sareikuots ūtrs torgu dublis!

Piec torgim sevkuram apmaklātuojam beja īspieja paraudzeit sovus spākus latgalīšu „tradicionalūs” mītu kaujuos. Pošim par puorsteigumu, iz itū aktivitati atsauceiba beja lela i saguoja daudz iņteresantuok, kai carāts i gaideits. Tyka izlamts kaidu reizi atkuortuot!

Pasuocīņs nūsasliedza ar tradicionalajim Maja dzīduojumim pi krysta, kuru nūrisē pīsadalieja VEF kuļturys pils ansamblis „Olūteņš”.

Bīdreiba „Latgolys Studentu centrs” soka lelu paļdis vysim, kas atbalstieja „Nūvodu dīnu Latgolys sātā” i raudzieja paleidzēt tuos nūrisei.

Eipašs paļdis Reigys Gareiguo seminara audziekņu grupai diakona Guntara Skuteļa vadeibā par sirsneigū svātbreidi, „Olūteņa” dalineicom par breineigajim maja dzīduojumim, Dailis teatra aktieram Kristapam Rasimam par atraktivitati i skaneigom dzīsmem, „Dandaru” akardeonistam Rolandam Zelčam par pavadiejumu dzīsmem i ļusteigim dančim, kai ari Breivdobys muzejam par īspieji turpynuot labi aizsuoktuos tradicejis!

Tai kai itymā godā tradicionaluo Latgalīšu dīna muzejā nabeja paradzāta, tod „Latgolys Studentu centrs” car, ka aizvadeitais pasuocīņs byus lobs stimuls Latgalīšu dīnys atjaunuošonai cytugod!

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.