Nūtykuši “Ceidaru” Bierzpiļs dzīsmem i dzīduotuojim veļteitī koncerti

2. novembrī Reigā i 4. novembrī Bolvu nūvoda Bierzpilī latgalīšu kulturys kusteibys “Volūda” folklorys kūpa “Ceidari”, kurā apsavīnuojuši Reigā i apleicīnē dzeivojūši latgalīši, aicynuoja iz sova albuma “Dzīduotumi, ļustātumi”, kas veļteits Bierzpiļs pusis dzīduotuojim i jūs dzīsmem, i reizē ari folklorys kūpys 10 godu dzīduošonys svātkim.

Latgalīšu kulturys kusteibys “Volūda” folklorys kūpa “Ceidari” Reigā roduos 2013. gods majā, kod dzīduot grybātuoju aicynuojumam īsavuiceit jaunys dzīsmis i sasatikt, lai regulari padzīduotu, atsasauce etnomuzykologe Marta Sīle (tūlaik Vaivode), uzajemūt tamā šaļtī vēļ naformaluos dzīduotuoju grupys vadeišonu. Jau piec napylna goda dzīduotuoji jau kai folklorys kūpa “Ceidari” pīsadaleja sovā pyrmajā storptautyskuo folklorys festivala “Baltica” skatē.

2023. gods vosorā kūpa īraksteja Bierzpiļs (voi kai tūlaik sauce – Domopolis) dzīduotuojim i dzīsmem veļteitu albumu “Dzīduotumi, ļustātumi”, kas ir kūpys pyrmais albums. Albumā “Dzīduotumi, ļustātumi” īkļautys desmit dzīsmis, kū sovulaik dzīduojuši Bierzpiļs apleicīnē dzymušī dzīduotuoji – Anna Bundža, Anna Stiernīks, Bronislava Romanovska, Cipirans Pokrotnīks (zynoms ari kai literats Augusts Egluojs) i Marta Šmidte. Vysys dzīsmis jimtys nu LU Literaturys, folklorys i muokslys instituta Latvīšu folklorys kruotivis digitalajā arhivā http://garamantas.lv atrūnamūs materialu. Albums īraksteits studejā “Lauska” Reigā pi skaņu režisora Kaspara Bārbala.

Īskandynojūt jaunū albumu i ari desmit godu pastuoviešonu, “Ceidari” aicynuoja iz svātku koncertim Reigā i Bolvu nūvoda Bierzpilī. 2. novembrī 19.00 stuņdēs koncerts izskanēja Reigā, Rakstnīceibys i muzykys muzejā. Koncertā “Ceidarim” pīsavīnuoja gosti i kūpys draugi folklorys kūpys “Dāre” (Daugmale) i “Dandari” (Reiga), kai ari dzīsminīks Kārlis Kazāks, ar kuru kūpā koncertā izsknēja sovulaik etnomuzykys izlasē “Sviests V” īdzīduotuo dzīsme “Zīmeņa, zīmeņa”. Sovpus 4. novembrī 15.00 stuņdēs “Ceidari” aicynuoja iz sasatikšonu Bolvu nūvoda Bierzpiļs Saīta nomā, kur albums tika izdzīduots kūpā ar folklorys kūpom “Saivenis” (Bierzpiļs), “Rūžupis veiri” (Leivuona nūvods), kai ari vokalū apvīneibu “Ūss”. Obeji koncerti beja bez īīšonys moksys i puļcieja kuplu tyvuoku i tuoļuoku skateituoju pulku.

Pyrma i piec koncertu tuo apmaklātuojim mobilajā baneru izstuodē beja vareiba apsavērt speciali topušu izstuodi, kas beja veļteita jaunajam albumam i Bierzpiļs pusis dzīduotuojim – Annai Bundžai, Martai Šmidtei, Bronislavai Romanovskai i Ciprianam Pokrotnīkam. Izstuode niu aizceļuojuse iz Bolvu nūvodu – Bolvu Centralū biblioteku – i piec laika byus apsaverama kai tī, tai Namaterialuos kulturys montuojuma centrā “Upīte” i cytuos Bolvu nūvoda vītuos.

Bierzpiļs dzīsmem veļteituo albuma “Dzīduotumi, ļustātumi” īrokstu finansiali pabaļstejuse Vaļsts kulturkapitala fonda mierkprograma „Latvīšu viesturiskūs zemu atteisteibys programa“ i privatī zīduotuoji, bet koncertu nūtikšonu i mobiluos izstuodis tapšonu – Vaļsts kulturkapitala fonds.

Reigys koncerta videoīroksts nūsaverams ite: