Nūskaidruoti spēlis “Latgalīšu volūdai draudzeiga vīta – ite Rēzekne!” veiksmeiguokī spālātuoji
14. oktobrī latgalīšu kulturys kusteiba “Volūda” aicynuoja interesentus iz spēlis-maršruta “Latgalīšu volūdai draudzeiga vīta – ite Rēzekne!” pyrmuos aktivuos sezonys nūslāguma pasuokumu, kurā tyka pīduovuots izīt spēlis maršrutu, pīraksteit diktatu, kai ari dīnys nūslāgumā pīdzeivuot veiksmeiguokūs spēlis daleibnīku apbolvuošonu i latgalisku koncertu.
Ituo gods junī latgalīšu kulturys kusteiba “Volūda” i portals lakuga.lv Rēzeknē atkluoja spēli-maršrutu, kurā rēzeknīši piļsātys gosti varēja izzynuot 13 (i na viņ) latgaliskuos vītys i latgalīšu volūdu piļsātvidē Rēzeknē. Spēlis pyrmajā sezonā tamā, izpiļdūt vysys aktivatis aplikacejā “Actionbound” pīsadaleja gondreiž 50 daleibnīki kai nu Rēzeknis, tai cytom Latgolys i Latvejis vītom. Iz nūslāguma pasuokumu tyka aicynuoti vysi daleibnīki, kuri beja pamatuši sovu kontaktinformaceju. Par spēlis pyrmuos sezonys uzvarātuoju, kas dabuoja vysu vaira punktu i padareja vysus aizdavumus vysu dreižuok, palyka spālātuoja ar daleibnīka vuordu “Ruuta K.”, puorejī bolvu sajiemieji tyka nūskaidruoti izlūzis veidā.
Spālātuoji sajieme vysaidys bolvys nu “Latgalīšu volūdai draudzeiga vīta – ite Rēzekne!” daleibys vītom i atbaļsteituojim: Latgolys viestnīceibys “Gors”, Latgolys Kulturviesturis muzeja, Zaļuos sinagogys, KUUP kopeja konceptveikala, Rēzeknis Tehnologeju akademejis, Latvejis Radejis Latgolys studejis i latgalīšu kulturys kusteibys “Volūda”.
Piec apbolvuošonys vysus kluotyn asūšūs prīcejā džeza muziķu Kristiana Justa, Mārča Lipska, Kalvja Sleža-Zaļkalna i solistis Laurys Svikšys latgaliskuo koncertprograma “Četrpadsmit stuosti”.
Spēle i tuos informativuos nūruodis ari iz prīšku byus daīmamys piļsātvidē kai izzynojūšs i izgleitojūšs pasuokums i materials, tik spālātuojim vaira nabyus īspieju pretendēt iz bolvom. Latgaliskūs vītus spēle ir taiseita tai, lai tū bezmoksys varātu izīt sevkurā laikā naatkareigi nu maršrutā īkļautūs vītu dorbalaika, taipat spālātuojim ir sagataveiti vairuoki puorsteigumi – eipašūs akceju voi spēlis suveniru veidā. Vyss, kas spālātuojim vajadzeigs – mobilais telepons ar škārsteiklu i kameru, gataveiba īt 5 km garu ceļu i tam veļteit 1,5–2 stuņdis laika. Ka spālātuoji grib pagasteit ari maršrutā īkļautajuos vītuos vydā, tod vālams spēlis laiku pīmāruot vītu dorbalaikam. Itys maršruts ir ari vīns nu veidu, kai piļsātys gostim īpazeit Rēzekni. Taipat spālātuojim maršrutā ir sagataveiti vairuoki puorsteigumi – kai spēlis vītu eipašī pīduovuojumi, tai ari maršruta nūīšonys suvenirs golapunktā. Itei spēle ir vīns nu veidu, kai piļsātys gosti izzynuot Rēzekni – jo eipaši tuos latgaliskū daļu.
Spēle “Latgalīšu volūdai draudzeiga vīta – ite Rēzekne!” ir vīna nu akcejis “Latgalīšu volūdai draudzeiga vīta” aktivitašu. Akcejis, kuru reikoj latgalīšu kulturys kusteiba “Volūda” i portals lakuga.lv, mierkis ir mudynuot kasdīnys saziņā vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu atsatīkšonu pret tū. Akcejis daleibnīkus var atpazeit piec eipašu akcejis uzleimu. Vaira informacejis par spēli ite: https://www.lakuga.lv/ltgdraudzeigs-rezekne/, bet par akceju ite: https://www.lakuga.lv/ltg-vita/.
Spēli “Latgalīšu volūdai draudzeiga vīta – ite Rēzekne!” informativi atbolsta Latgolys Turisma asociaceja, bet spēle i tuos aktivitatis teik reikuotys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozū kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Fotogalerejā: spēlis “Latgalīšu volūdai draudzeiga vīta – ite Rēzekne!” nūslāguma pasuokums i koncerts, foto Agnese Skangale i Edeite Laime
