Myusu sirdis pukst latgaliski
Interveja ar dzejnīci, rūkdorbnīci, bīdreibys „Latgolys Studentu centrs” (LgSC) aktivu personeibu nūrunuota LgSC tagadejā Rēzeknis sātā – Humanitarūs i juridiskū zynuotņu fakuļtatis 3. stuovā, 313. kabinetā, kas reizī ir ari Rēzeknes Augstškolys (RA) Sabīdriskū attīceibu nūdaļa. Sasateikam nūrunuotajā laikā pi biroja durovom divūs dīnā, kod saule, izaver, iz dažom minutem atvalk olpu. Īejūt LgSC „golvonajā birojā”, Dagneja spareigi latgaliski pasveicynoj sovu dorba kabineta kaimineicu ar „Vasala, kai īt?” Piečuok ari izskaņ vaicuojums, voi Dagneju kaids ir mekliejis. Suocās jauna dorba piecpušdine. I tai suocās myusu saruna.
Lyudzu, pastuost, kas eistyn ir LgSC, jo nazynuotuoji itū burtu salykumu bīži uztver kai mistisku organizaceju voi koč kū, kas saisteits ar augstškolys īstuodi.
Vaicuojumu, kas ir Latgolys Studentu centrs parosti uzdūdu pošim LgSC aktivistim i draugim, kuru kliust vys vairuok, i myusu ryndys kliust vys kūšuokys. Tai ir, bīži LgSC teik saisteits ar augstškolu, jo Rēzeknes birojs atsarūn RA telpuos. Laikam ir tai, ka vyspyrms LgSC ir studentu bīdreiba (navaļstiska organizaceja), i tod jau kotrs tū interpretej i izjiut sovaižuok, vīnam tī ir jautri, rodūši pasuokumi, projektu realiziešonys process, ūtram – kruosainys sarunys latgaliski, trešajam – bareņš sovejūs, caturtajam – kūpeiga čaja dzeršona i, skaidra līta, latgalīši, kuri vysod ir suplok.
Kaidi ir Tovi pīnuokumi, vodūt LgSC biroju Rēzeknē?
Par pīnuokumu daudzumu nikod naasmu žāluojusēs (pasmaida i nadaudz nūsapyuš). Birokratejis leikumi – dokumentacejis kuortuošona, kas ir cīš laikītiļpeigi, ryupejūs par bīdrym, jūs informejūt, ik pa laikam sasaucūt kūpā i jautri pasarunojūt voi lauzūt golvu par kaidu sarežgeitu vaicuojumu, jaunu bīdru pīsaistis pasuokumi, rokstu presis relizis i rokstus par jau nūtykušajim i tim pasuokumim, kas vēļ tikai byus, informacejis publiciešona sātys lopā lgsc.lv i „Latgalīšu Kulturys gazetā” lakuga.lv, aktivi mekleju sponsorus, draugus i atbaļstietuojus pasuokumu organiziešonā i „draudzejūs” ar RA, organizeju pasuokumus, sasateiku ar cylvākim, daudz runoju. Bet nanūviertiejami ir īgivumi: īspieja runuot, raksteit latgaliski, dareit tū, kas paeistam ir saistūšs dvēselei. Tys nūzeimoj byut latgaliskuos asiņsritis vydā.
Ar kaidom problemom sasateic, koordinejūt dorbu LgSC?
Problemys var sameklēt vysod. Byuteibā vuorda „problema” sinonims ir vuords „aizdavums” voi „vaicuojums”. Bet iz vaicuojumim var atrast atbiļdis, ka viņ tī nav cīš retoriski, i aizdavumu var izpiļdeit. Cytu reizi saīt, ka pats sev kliusti par lelu problemu. Dorbs ite prosa daudzi laika, energejis, bīži, it seviški pādejā laikā, dažaidi pasuokumi nūteik gondreiž voi kotru dīnu, i kur nu vēļ studejis, vuiceibu dorbs i cytys aktivitatis, piec tuo vysa esi „nūsaskriejs”, i vokorā, kod beidzūt teic sātā, esi kai šmuks puču trauks, tikai vokorā jau bez iudiņs i zīdy koč kur nūsaglobovuš. Asu garastuovūkļa cylvāks, bet taišni LgSC draugi i cyti lobi ļauds ir tī, kas atīt iz biroju, mes parunojam par dzeivi, dorbim, studejom, kasdīnu, varbyut kuodreiz ari par kaidom aktualom problemom, par LgSC, un tod rūnās taida pateikama „placa” sajiuta, ka draugi vysod ir blokus, vyss ir paveicams i smogais nav vaira tik smogs (otkon pasmaida, it kai atguoduotu kaidu nasenu jauku nūtykumu).
Pastuosti, lyudzu, par LgSC veiksmeiguokajim projektim i pasuokumim!
Vīns nu veiksmeiguokajīm projektim, kas eistineibā ir stabils i veiksmeigs styurakmiņs Rēzeknes LgSC birojam Rēzeknē, ir SIF (Sabīdreibys integracejis fonds) projekts par telpu īri i LgSC biroju vadeituoju olgom. Bez ituo projekta nabyutu bejs īspiejams ni atvērt biroju Rēzeknē, ni ari organizēt bīdreibys daudzūs pasuokumus. Prūtams, cīš nūzeimeigs projekts, kas veiksmeigai turpynojās i turpynuosīs, es ceru, vēļ ilgi, ir „Latgalīšu Kulturys gazeta”. Bet runojūt par pasuokumim i pasuokumenim, pyrmais, kas maņ nuok pruotā vīnmār – tī ir literari muzykālī pasuokumi „Latgalīts-Latgalīšam-Draugs”, kai ari koncerti „Taiseits Latgolā”, jaunīšu seminari „Atzolys”. Itī pasuokumi jau ir klivuši par skaistim, nūzeimeigim nūtykumim gon daleibnīkim, gon skateituojim. (Dagneja maņ pīmīdz ar aci, jo zyna, ka asmu pīsadaliejusēs dažūs nu mynātajim.)
Kai teik pīsaistāti jauni LgSC bīdri?
Informaceja par LgSC ir bīzā kuortā atrūnama interneta sātys lopuos, pīmāram, www.lgsc.lv, dūmubīdru grupā www.draugiem.lv i cytur. Informacejis, munupruot, dīzgon pīteikami, īinteresātī vysod zyna par aktualitatem i jaunī, tūpošī draugi par LgSC uzzyna nu „sovejim” kursabīdrim, draugim. Pyrma pasuokumim i LgSC jaunuokajim nūtykumim kūšys, latgaliski raksteitys afišys ir pyrmuos, kas bīži īintrigej jaunūs bīdrus. Interesentim jaunumi, svaiguokuos zinis par LgSC dzeivi kotru nedeli teik syutātys iz e-postu. Bet piec pīredzis – vyslobuok par informacejis veiksmeiguokū nesieju kliust tīšais, mutiskais kontakts, zinis nūdūšona, tai saceit, „nu mutis mutī”, jo, ja draugs soka: „Ejam iz LgSC, tur ir forši!”, kai gon var naaizīt..
Voi es pareizi saprūtu, ka par LgSC bīdru var kliut kotrs interesents?
Byuteibā tai ir, bet uzsvors teik lykts vairuok iz jaunīšu auditoreju, kaut gon prūm nivīnu naasam dzynuši. Interesenti ir aicynuoti iz sev tyvuokū LgSC biroju (Reigā, Daugpilī voi Rēzeknē), kur ir juouzroksta īsnīgums, i tod īsnīgumam teik pīvīnuoti divu jau asūšūs LgSC bīdru rakstiski apstyprynuojumi. Īsnīgums teik izskateits vaļdis sapuļcē i asūšais voi tūpūšais latgalīts teik pījimts LgSC bīdru vydā. Vīnkuorša procedura, bet pozitivu īguvumu ir daudz, koč voi tys, ka bīdrs automatiski kliust par juridiskys personys dali i latgaliskuos dūmys paudieju Latvejī. Runojūt par svareiguokajim plusenim daleibā LgSC, kaidam tai radūši i latgaliski teik aizpiļdeits breivais laiks, cyts te atrūn jaunus i cīši lobus draugus, sarunu bīdrus, kaids sovu pīpiļdejumu rūn aizrauteigā pasuokuma organiziešonā i jaunu ideju generiešonā, cyti vīnkuorši giust prīku, ateimūt iz kaidu latgaliskuos dvēselis sasiļdeitu, jauku pasuokumu.
Kaida, Tovupruot, ir LgSC bīdru attīksme pret latgaliskūs vierteibu sasaglobuošonu i latgaliskuo nūzeimi kasdīnā?
Iz itū vaicuojumu kotram atbiļde ir sova. Munupruot, attīksme pret lītom, vierteibom ir tei, kas raksturoj cylvāku. Vyss ir attīksmis vaicuojums. Ka jaunīšim tys nabyutu saistūši, es ite sādātu vīna i LgSC nivīnam nabyutu vajadzeigs. Bet ir vajadzeigs i jiutu, ka ir ari gona svareigs, lai atrastu tam laiku ari breižim saspryngtajā aktīvuo studenta dzeivī. Ja jaunīši īt i runoj latgaliski, tod itei vierteiba – latgaliskais i volūda ir svareiga, i grybātūs ticēt, ka ari byus svareiga vysod.
Pastuosti, lyudzu, par LgSC nuokūtnis planim!
Nuokūtne īplānoj myusus. Myusu laikūs koč kū plānuot ir taipoš kai zeimēt jiurys smiļktī gleznys, cerūt, ka viļni, kuri ik pa breižam sleid gleznom puori, tū saglobuos. Bet es grybātu, lai sovu darbeibu veiksmeigai turpinoj jau asūšī LgSC biroji i itam bareņam pīsavīnoj, pīmāram, biroji Preiļūs, Kruoslovā, Ludzā. Niu ar LgSC bīdrim kaļam tyvuokuo laika pasuokumu i aktivitašu planu, saglobojūt jau asūšūs – īmīļuotūs, tradicionālūs. Vyss turpynojās, bet, ja kaidu šaļti LgSC sovā skriejīnī apsastuoj, tod draugi muok uzmundrynuot i kai lobs treners pasaceit eistūs vuordus, lai skriejīnī turpynuojums byutu vēļ veiksmeiguoks i dinamiskuoks.
Autors: Ilze Vaivode
Puorpublicāts nu http://lakuga.lv/posts/myusu-sirdis-pukst-latgaliski/